अदालतको आदेशपछि महोत्तरी कारागार पुर्याइए बम्जन

२६ पुस, काठमाडौं । नेपाल प्रहरीले जिल्ला अदालतको आदेशपछि रामबहादुर बम्जनलाई महोत्तरी कारागार पुर्याएको छ । हत्या, जबरजस्ती करणी, बाल यौन शोषणलगायतका अभियोगमा पक्राउ परी पुर्पक्षका लागि थुनामा पठाइएका रामबहादुर बम्जनलाई महोत्तरी कारागार पुर्याइएको हो । 

सर्लाही जिल्ला अदालतले पुर्पक्षका लागि थुनामा राख्ने आदेश दिएसँगै बम्जनलाई थुनाका लागि जिल्ला कारागार महोत्तरी पठाइएको थियो । अब उनलाई त्यहीँ राखिनेछ । सर्लाही जिल्ला न्यायाधीश विष्णुप्रसाद रेग्मीको एकल इजलासमा आज भएको थुनछेक बहसपछि पुर्पक्षका लागि थुनामा राख्ने आदेश भएको हो । 

लगभग ४ घण्टा चलेको बहसमा वादीको तर्फबाट जिल्ला सरकारी वकिल कार्यालयका प्रमुख कैलाश दाहाल र अधिवक्ता अनन्त न्यौपाने तथा प्रतिवादीका तर्फबाट अधिवक्ताहरू डा. कुन्साङ लामा, अजय तामाङ, दिलीपकुमार झा, महनिधि सेडाई र अमृतकुमार लामाले बहस गरेका थिए ।