पहिलो टी–२० मा भारतद्धारा अफगानिस्तान ६ विकेटले पराजित

२६ पुस, काठमाडौं । भारतले पहिलो टी–२० क्रिकेटमा अफगानिस्तानलाई ६ विकेटले पराजित गरेको छ । मोहालीमा खेलिएको उक्त खेलमा टस हारेर पहिले ब्याटिङ गरेको अफगानिस्तानले २० ओभरमा पाँच विकेट गुमाएर १५८ रन बनाएको थियो ।

अक्षर पटेल र मुकेश कुम्राले घातक बलिङ गर्दै २–२ विकेट लिए । जवाफमा भारतले १७.३ ओभरमा चार विकेट गुमाएर लक्ष्य पूरा गर्‍यो। शिवम दुबेले ४० बलमा ६० रनको अविजित इनिङ खेले ।

यसै क्रममा रिंकु सिंहले ९ बलमा १६ रन बनाएर अविजित रहे । तीन खेलको टी–२० सिरिजमा भारतले १–० को अग्रता लिएको छ । दोस्रो खेल १४ जनवरीमा इन्दौरमा हुनेछ ।

जुनमा हुने टी-२० विश्वकपअघि भारतको यो अन्तिम टी-२० सिरिज हो। योसँगै कप्तान रोहित शर्मा र विराट कोहली पनि यो सिरिजका लागि टी–२० टोलीमा फर्किएका छन् । विराटले व्यक्तिगत कारणले पहिलो खेल खेलेका थिएनन् । योसँगै अफगानिस्तानका स्टार स्पिनर राशिद खान चोटका कारण सिरिजबाट बाहिर छन् ।