नेपाल पुनर्बिमा कम्पनीको चौथो त्रैमासको वित्तीय विवरण सार्वजनिक

२७ पुस, काठमाडौं । नेपाल पुनर्बिमा कम्पनीले वित्तीय विवरण सार्वजनिक गरेको छ । कम्पनीले गत आर्थिक वर्षको चौथो त्रैमाससम्मको वित्तीय विवरण सार्वजनिक गरेको हो ।

कम्पनीले चौथो त्रैमाससम्म आइपुग्दा निर्जीवन र जीवन बिमा व्यवसायतर्फ खुद नाफा बढेको जानाएको छ। जसअनुसार अघिल्लो वर्ष ५६ करोड ५० लाख ४४ हजार रूपैयाँ रहेको र निर्जीवन बिमा व्यवसायतर्फको खुद नाफा गत वर्षको चौथो त्रैमासमा ९१ करोड २० लाख १६ हजार रूपैयाँ पुगेको जनाएको हो ।

यता, अघिल्लो वर्ष यसैअवधिमा जीवन बिमा व्यवसायतर्फ १० करोड ८८ लाख ३४ हजार रूपैयाँ नाफामा कमाएको यस कम्पनीले गत वर्ष चौथो त्रैमाससम्ममा १७ करोड ६६ लाख ४७ हजार रूपैयाँ नाफा कमाएको छ । गत वर्ष असार ममसान्तसम्म यस कम्पनीले निर्जीवन व्यवसायबाट ५ अर्ब ५० करोड ९६ लाख ५० हजार रूपैयाँ खुद बिमा शुल्क आर्जन गरेको छ ।

अघिल्लो वर्षको यसैअवधिमा यसले ८ अर्ब ८७ करोड ६७ लाख ७१ हजार रूपैयाँ निर्जीवन व्यवसायबाट खुद बिमा शुल्क आर्जन गरेको थियो । त्यस्तै गत वर्षको चौथो त्रैमाससम्ममा जीवन बिमा व्यवसायबाट २ अर्ब १ करोड ३० लाख ४७ हजार रूपैयाँ खुद बिमा शुल्क आर्जन गरेको छ । अघिल्लो वर्षको यसैअवधिमा जीवन बिमा व्यवसायबाट १ अर्ब ८८ करोड ९८ लाख रूपैयाँ खुद बिमा शुल्क आर्जन गरेको थियो । यस अवधिसम्म पुनर्बिमा कम्पनीको चुक्ता पुँजी १२ अर्ब ८१ करोड रूपैयाँ रहेको छ ।

गत वर्षको असार मसान्तसम्म यस कम्पनीको निर्जीवन व्यवसायतर्फको जगेडा कोषमा ३ अर्ब ४३ करोड ६१ लाख १७ हजार रुपैयाँ र जीवन बिमातर्फ ७१ करोड १९ लाख ८४ हजार रूपैयाँ जम्मा भएको छ । निर्जीवन बिमा कोषको आकार ३ अर्ब ४७ करोड ६९ लाख २९ हजार रूपैयाँ रहेको छ । जीवन बिमा कोषको विवरण भने रिपोर्टमा उल्लेख छैन । चौथो त्रैमाससम्म यस कम्पनीको प्रतिशेयर आम्दानी वार्षिक ८ रूपैयाँ ५० पैसा र प्रतिशेयर नेटवर्थ १५९ रूपैयाँ ५९ पैसा रहेको छ ।