आजदेखि पीएम कप क्रिकेट प्रतियोगिता, सात प्रदेश र तीन विभागीय टिम खेल्दै

२८ पुस, काठमाडौं । नेपाल क्रिकेट संघ 'क्यान' ले आयोजना गरेको प्रधानमन्त्री कप पुरुष राष्ट्रिय क्रिकेट प्रतियोगिता 'पीएम कप' आजदेखि शुरु हुदैँ छ । पीएम कप पुस २८ देखि माघ २० गतेसम्म संचालन हुने छ ।

प्रतियोगितामा सात प्रदेशका टिम र तीन विभागीय टिम नेपाल पुलिस क्लब, एपीएफ र नेपाल आर्मीले भाग लिने छन् । हरेक टिमले एक अर्काविरुद्ध एक एक पटक खेलेपछि शिर्ष दुईमा हुने टिमले फाइनल खेल्ने तालिका क्यानले सार्बजनिक गरेको छ । यस पटक पीएम कप पहिलो पटक काठमाडौं बाहिर भैरहवामा पनि संचालन हुदै छ ।

एकदिवसीय फर्म्याटमा हुने पीएम कपको पहिलो दिन तीन खेल हुने तालिका रहेको छ । जसमा टियु क्रिकेट मैदानमा बागमती प्रदेशले नेपाल पुलिसको सामना गर्ने छ भने मुलपानी क्रिकेट मैदानमा कोशी प्रदेशले मधेश प्रदेशको सामना गर्ने छ । त्यस्तै भैरहवा क्रिकेट ग्राउण्डमा लुम्बिनी प्रदेशले गण्डकी प्रदेसको सामना गर्दै छ ।