स्थानीय तहले प्राविधिक रुपमा नभई मनोगत आधारमा पुर्वाधार बनाउँदा जोखिम बढेको होः मन्त्री गुरुङ

२८ पुस, काठमाडौं । शहरी विकासमन्त्री सीता गुरुङले स्थानीय तहमा राष्ट्रिय शहरी भवन संहिताको कार्यान्वयन हुन नसकेको बताएकी छन् । उनले शहरी भवन संहिता कार्यान्वयन नहुँदा भुकम्पलगायतका प्राकृतिक प्रकोपको डर भइरहने बताएकी छन् । मन्त्री गुरुङले सडक पूर्वाधारका खाका प्राविधिक आधारमा नभई मनोगतका आधारमा बनाउँदा विपत्ति निम्तिने गरेको बताइन् ।  

डिप्लोमा इन्जिनियर्स एसोसिएसनले ललितपुरमा भूकम्प दिवसको सेरोफेरोमा आयोजना गरेको प्रकोप प्रतिरोधी र भौतिक पूर्वाधार गुणस्तर विषयक अन्तरक्रिया कार्यक्रमलाई सम्बोधन गर्दै उनले शहरी विकास मन्त्रालयले राष्ट्रिय सहरी भवन संहिता निर्माण गरेर ७५३ वटै पालिकामा पठाएको भए पनि प्रभावकारी ढंग कार्यान्वयन नभएको बताइन् ।
 
उनले आफूले कारण खोज्दा पालिकाहरूमा प्राविधिकको कमीका कारण स्थानीय तहले कार्यान्वयन गर्न नसकेको जवाफ दिएको बताइन । सरकारले बनाएका नीति नियम कार्यान्वयन गर्न पनि कुनै न कुनै रूपमा बेस बसाउन जरुरी रहेको उनको भनाइ थियो । 

मन्त्री गुरुङले सरकारले बनाएका अनुगमन र मूल्याङ्कन प्रभावकारी बनाउन र अभिलेखीकरण गर्न नसके द्रुत गतिमा फड्को भनेर अघि बढाइएका कामहरू प्रभावकारी बन्न नसक्ने दाबी गरिन् । उनले अनुगमन र मूल्याङ्कनलाई प्रभावकारी बनाएर त्यसको अभिलेखीकरण गर्न जरुरी रहेको बताइन् ।