राष्ट्रिय सभा निर्वाचनमा गठबन्धनका उम्मेदवारलाई मतदान गर्न आग्रहस्वरुप शीर्ष नेताले संयुक्त वक्तव्य जारी गर्ने

२८ पुस, काठमाडौं । राष्ट्रिय सभा निर्वाचनमा गठबन्धनका उम्मेदवारलाई मतदान गर्न मतदाताहरूलाई आग्रह गर्दै शीर्ष नेताहरूले संयुक्त वक्तव्य जारी गर्ने भएका छन् । सत्तारुढ दलको राष्ट्रिय सभा निर्वाचन केन्द्रीय समन्वय समितिको बैठकले मतदातालाई गठबन्धनका उम्मेदवारहरूको पक्षमा मतदानका लागि शीर्ष नेताहरूलाई संयुक्त वक्तव्य जारी गर्न लगाउने निर्णय गरेको छ । 

शनिबार बसेको सत्तारुढ गठबन्धन दलको राष्ट्रिय सभा निर्वाचन केन्द्रीय समन्वय समितिको बैठकले शीर्ष नेतालाई संयुक्त वक्तव्य जारी गर्न लगाउने निर्णय गरेको हो । बैठकले राष्ट्रिय सभा निर्वाचन केन्द्रीय समन्वय समिति–२०८० को सचिवमा अधिवक्ता केशवराज जोशीलाई चयन गर्ने निर्णय पनि गरेको छ ।

राष्ट्रिय सभा निर्वाचन प्रदेश समन्वय समिति र जिल्ला समन्वय समितिलाई गठबन्धनका उम्मेदवारहरूको पक्षमा मतदाताहरूसँग चुनाव प्रचारप्रसारदेखि मतगणनासम्म गर्नुपर्ने कार्यहरुको बारेमा आवश्यक निर्देशन दिने बैठकले निर्णय गरेको छ । 

राष्ट्रिय सभामा रिक्त हुन लागेको २० सिटमध्ये १९ सिटमा आगामी माघ ११ गते निर्वाचन हुँदैछ । सत्तारुढ गठबन्धन दलले उक्त निर्वाचनमा साझा उम्मेदवार उठाएका छन् । जसमा नेपाली कांग्रेसले १० सिट, नेकपा (माओवादी केन्द्र) ले ६ सिट, नेकपा (एकीकृत समाजवादी) ले २ सिट र जनता समाजवादी पार्टीले १ सिटमा साझा उम्मेदवार उठाएको छ ।