फागुन पहिलो साता विधान सम्मेलन गर्ने माओवादीको निर्णय, प्रचण्डको नेतृत्वमा एकता संयोजन समिति गठन

२८ पुस, काठमाडौं । नेकपा माओवादी केन्द्रले फागुन पहिलो हप्ता विधान सम्मेलन गर्ने भएको छ । शनिबार बसेको पार्टीको स्थायी कमिटी बैठकले फागुन १, २ र ३ गते विधान सम्मेलन गर्ने निर्णय गरेको प्रवक्ता अग्नि सापकोटाले जानकारी दिए ।

उनका अनुसार स्थायी कमिटी बैठकले प्रतिनिधि छनोटको मापदण्ड पनि बनाएको छ । यस्तै बैठकले पार्टी एकताका लागि एकता संयोजन समिति बनाएको छ ।

स्थायी कमिटी बैठकले प्रधानमन्त्री तथा पार्टी अध्यक्ष पुष्पकमल दाहाल प्रचण्डको संयोजकत्वमा समिति बनाउने निर्णय गरेको सापकोटाले बताए । विधान सम्मेलनका प्रतिनिधि छनोटका लागि मापदण्ड बनाइएको पनि उनले बताए । 

यस्तै आजकै बैठकमा माओवादीका प्रदेश इन्चार्जहरुले रिपोर्टिङ गरेका थिए । अध्यक्ष प्रचण्डले प्रदेश इन्चार्जहरूको रिपोर्टको संश्लेषण गरेको उनले बताए ।