डीएसपीको बढुवा रोकेर एसपी सरुवामा चलखेल सुरु

२९ पुस, काठमाडौं । नेपाल प्रहरीले डीएसपीबाट एसपी बढुवा र एसपीको सरुवा एकैपटक गर्न लागेको छ । एक वर्षमा इन्चार्ज खाली हुने जिल्लाको एसपी सरुवा र डीएसपी बढुवा एकै पटक हुनेगरी तयारी थालेको हो । प्रहरी प्रधानकार्यालयले डीएसपीबाट एसपी बढुवा गर्न एक महिनाअघि नै कसरत गरेको भएपनि मन्त्रालय बाधक बनेपछि रोकिएको छ । १७ भन्दा बढी जिल्लाका एसपीको कार्यकाल १ बर्ष पुगेकाले सरुवा हुन लागेको भएपनि गृहमन्त्रालयले कसलाई पठाउने भन्दै लेखाजोखा गर्न थालेको छ ।

धनकुटा, मोरङ, झापा, सिरहा, महोत्तरी, पर्सा, चितवन, सिन्धुपाल्चोक, धादिङ जिल्लाका एसपीको एक बर्ष अवधि पुगिसकेको छ । त्यस्तै, तनहुँ, रुपन्देही, बागलुङ, स्याङ्जा, पाल्पा, बार्दिया, कन्चनपुर, पश्चिम नवलपरासीका एसपीको पनि एक बर्ष पुगेको छ । पर्सामा यतिबेला कुमोम शाह छन उनको स्थानमा काठमाडौमा रहेका एसपी कुमोद ढुंगेललाई पठाउने तयारी भएको छ । यस्तै झापामा रहेका दुर्गा रेग्मीको काम चित्त नबुझेको भन्दै उनको स्थानमा ललितपुरबाट नवराज कार्की वा गौतम केसी मध्ये एकलाई पठाउने तयारी भएको छ । तर झापामा अपराध अनुसन्धान कार्यालयमा कार्यरत मिलन केसीले बाजी मार्ने संभावना रहेको छ ।  

डीआईजी सरुवामा यज्ञविनोद पोखरेललाई सबैभन्दा आकर्षक मधेश प्रदेशमा पठाउन सफल भएकी गृहमन्त्री नारायणकाजी श्रेष्ठकी स्वकीय सवि सुशन कर्माचार्यले खाली हुने जिल्लामा कसलाई पठाउने भनेर लेखाजोखा गरिरहेको स्रोतको दावी छ । रुपन्देहीको एसपीका लागि दयानिधि ज्ञवाली, चक्रराज जोशी, गौतम केसी, सन्तोष खड्का, रमेश पण्डितको प्रतिस्प्र्धा रहेको छ । पण्डितले शक्तिकेन्द्रबाट दबाब दिए पनि केही महिनाअघि मात्र नुवाकोटको इन्चार्जबाट सरुवा भएकाले उनको निकै कम छ ।

एसपी बढुवामा एक नम्बरमै परेका गौतम केसी लुम्बिनी प्रदेशका उद्योग, पर्यटन तथा यातायात मन्त्री रोज राणामार्फत् रुपन्देही जाने प्रयासमा छन् । झापाको एसपीमा मिलन केसी र बसुन्धरा खड्का लागेका छन् । चितवनका लागि शालिग्राम शर्मा पौडेल र भावेश रिमालले आ आफ्नो च्यानल प्रयोग गरिरहेका छन् । पौडेलले चितवनको डीएसपीको रुपमा काम गरिसकेका छन् । मोरङमा बसिसकेका सन्तोष खड्का रुपन्देही नभए काभ्रेको एसपी हुने दाउमा छन् । कांंग्रेस नेता डा. शेखर कोइरालालाई भनसुन गरी मोरङमा एसपी भएका र बीचमै तानिएका शान्तिराज कोइराला सिन्धुपाल्चोकको एसपी हुन दौडधुप गरिरहेका छन् । धनकुटाबाट एसपी कृष्ण कोइराला काठमाडौं परिसरमा आउन चाहिरहेका छन् ।