राष्ट्रिय स्तरको दोहोरीगीत प्रतियोगिता फागुन ४ देखि ७ गतेसम्म आयोजना गरिने

२९ पुस, काठमाडौं । राष्ट्रिय लोक तथा दोहोरीगीत प्रतिष्ठान नेपालको आयोजनामा सातौं राष्ट्रिय रनिङ शिल्ड दोहोरीगीत प्रतियोगिता हुने भएको छ । आगामी फागुन ४ देखि ७ गते सम्म धादिङको चरौंदीमा दोहोरी प्रतियोगिता आयोजना गरिएको हो । 

प्रतियोगितामा प्रथम हुने समूहले नगद ३ लाख रूपैयाँ, रनिङ शिल्ड र प्रमाणपत्र पाउनेछन् । यस्तै द्वितीयले २ लाख रूपैयाँ, तृतीयले १ लाख रूपैयाँ र सन्त्वनाले ५० हजार सहित प्रमाणपत्र प्राप्त गर्नेछन् । 

प्रतियोगितामा साहभागि समूहका कलाकारहरु मध्येबाट उत्कृष्ट गायक, उत्कृष्ट गायिका, उत्कृष्ट भेषभुषा र नवगायक गायिकालाई समेत उत्कृष्ट पुरस्कार व्यवस्था गरिएको लोक तथा दोहोरीगीत प्रतिष्ठान नेपालका अध्यक्ष रिता थापा मगरले जानकारी दिइन् ।

प्रतियोगितामा भाग लिन चाहने समूहलाई राष्ट्रिय लोक तथा दोहोरीगीत प्रतिष्ठान नेपाल मातहतका शाखाका समितिको सिफारिस अनिवार्य गरिएको छ ।  

साहभागि कलाकारको फोटो र परिचयपत्र अनिवार्य बनाइएको छ । साहभागि समूहले आगामी माघ २५ गतेसम्म समूह दर्ता गर्नुपर्ने आयोजकले जनाएको छ ।