माघ १ गते पाँचौं पटक उद्घाटन हुँदैछ मेलम्चीको पानी

२९ पुस, काठमाडौं । मेलम्चीको पानी सोमबार बिहान उपभोक्ताको धारमा आउँदैछ । यसको उद्घाटन प्रधानमन्त्री पुष्पकमल दाहाल प्रचण्डले गर्ने कार्यक्रम तय भएको छ । प्रधानमन्त्री प्रचण्डले सिंहदरबारस्थित आफ्नै कार्यालय परिसरको धारा खालेर सोमबार सात महिनादेखि रोकिएको खानेपानी बितरणको पाँचौँ पटक शुभारम्भ गर्न लागेका हुन् । 

मेलम्चीका पानी काठमाडौं आउनु आफैमा रोचक बन्न थालेको छ । पटकैपिच्छे मेलम्चीबाट काठमाडौं पानी आउँदा उद्घाटन गर्ने परम्परा जस्तै भएको छ । पानी वितरण गरेको तीन वर्ष बित्न लाग्दा पनि खानेपानी मन्त्रालयले मेलम्चीको पानी काठमाडौंका उपभोक्ताको धारामा निरन्तर पठाउन सकेको छैन । हरेक वर्ष यो आयोजनामा समस्या आइनैरहन्छ । 

बाढीले मेलम्चीको हेडवर्कस पुरिएर वर्षेनि क्षति गर्दै आएको छ । मर्मत गरेर पानी वितरणको तयारी हुने वित्तिकै हरेक हिउँदमा पटकै पिच्छे प्रधानमन्त्री वा मन्त्रीले उद्घाटन गरिहाल्छन् । यसपटक पनि त्यसैको निरन्तरताको तयारीमा प्रधानमन्त्री छन् । खानेपानी मन्त्रालयका अनुसार उपभोक्ताको धारामा बिहानै पानी पठाएर ९ बजे प्रधानमन्त्री दाहालले वितरणको शुभारम्भ गर्ने कार्यक्रम रहेको छ । 

पछिल्लो समय बाढीले मेलम्ची मुहान पुरिएको थियो । मुहान क्षेत्रमा बाढीपहिरोका कारण ६५ अर्बभन्दा बढी खर्च भइसकेको मेलम्ची आयोजनाको भविष्यमाथि नै प्रश्न उठिरहेका बेला सरकारसँग यसलाई स्थायित्व दिने योजना भने बनाएको छैन । केवल प्रधानमन्त्री र मन्त्रीहरु उद्घाटनका लागि भने हर घडी तयार हुने गरेका छन् । तीन वर्ष अघि नै वितरण सुरु भएको मेलम्चीको पानी काठमाडौं बासीका लागि महत्वपूर्ण छ । काठमाडौंवासीलाई पानी कसले खुवायो भन्ने सन्देश दिन राजनीतिक नेतृत्वले उद्घाटन होडबाजी गगरिरहेका छन् । 

तत्कालिन प्रधानमन्त्री केपी ओलीले ०७७ को फागुन २२ मा सुन्दरीजलस्थित ट्रिटमेन्ट प्लान्टको फ्लसिङ टनेलको हाइड्रोमेकानिकलको बटम थिचेर पानी खसालेका थिए । त्यसको एक महिनापछि तत्कालिन राष्ट्रपति विद्यादेवी भण्डारीले भृकुटीमण्डमा बनाएको धारामा पानी खोलेर उद्घाटन गरेकी थिइन् ।

२०७८ असारको बाढीले फेरी मुहान पुरिएर खानेपानी बितरण बन्द भयो । पछि २०७९ बैशाखमा ११ मा अस्थायी रुपमा काठमाडौंमा वितरण गरियो, त्यसबेला तत्कालिन खानेपानी मन्त्री उमाकान्त चौधरीले उद्घाटन गरेका थिए । तर बाढीपहिरोको भय बढेपछि एक महिना पानी सञ्चालन गरेर २०७९ जेठमा सुरुङ बन्द गरिएको थियो । त्यसपछि फेरि ६ महिनापछि बाढीको भयले २०८० को असारमा सुरुङ बन्द गरियो । गत साउनको अन्तिम साता दुई दिन आएको बाढीले २०७८ मा जत्तिकै १५ देखि २० मिटर अग्लो गेग्रानले मुहान पुरिएपछि अहिले मर्मत गरेर पुनः वितरण गर्न लागिएको छ, र फेरि उद्घाटनको कार्यक्रम तयार भएको छ ।