प्राधिकरणको आईपीओ स्वीकृतिका लागि मन्त्रिपरिषदमा पेश

२९ असोज, काठमाडौं । नेपाल विद्युत प्राधिकरणलाई प्रिमियम मूल्यमा धितोपत्रको प्राथमिक सार्वजनिक निष्कासन (आईपीओ) जारी गर्नका मन्त्रिपरिषद्मा प्रस्ताव पेश भएको छ । प्राधिकरणलाई आईपीओ निस्कासन गर्न दिने प्रस्ताव स्वीकृतिका लागि ऊर्जा मन्त्रालयले मन्त्रिपरिषद्मा पठाएको हो । 

अर्थ मन्त्रालयले आईपीओ निस्कासनका लागि सहमति दिएसँगै यस सम्बन्धी प्रस्ताव ऊर्जाले अघि बढाएको हो । प्राधिकरणको जारी पूँजी ३ खर्ब पुर्याएर त्यसको १० प्रतिशत शेयर सर्वसाधारणमा जारी गर्ने तयारी गरिएको छ । प्राधिकरणले प्राधिकरण ऐन, २०४१ बमोजिम संस्थाको शेयर सर्वसाधारणमा बिक्री गर्ने भएको हो ।

प्राधिकरण सञ्चालक समितिको गत २५ मंसिरमा बसेको बैठकले आईपीओ जारी गर्ने निर्णय गरेको थियो । प्राधिकरणले प्रतिशेयर १०० रुपैयाँ अंकित मूल्यमा प्रतिसशयर १३० रुपैयाँ प्रिमियमसहित प्रतिकित्ता २३० रुपैयाँमा आईपीओ जारी गर्ने निर्णय गरेको छ । प्राधिकरणले जारी पूँजी ३ खर्ब रुपैयाँको १० प्रतिशत शेयर सर्वसाधारणलाई जारी गर्ने निर्णय गरेको हो । 

अब ३० अर्ब पूँजी संकलनका लागि ३० करोड कित्ता शेयर निस्कासन हुनेछ । धितोपत्र दर्ता तथा निष्कासन नियमावली, २०७३ मा खुद सम्पत्ति (नेटवर्थ) को दुई गुणासम्म प्रतिशेयर मूल्य कायम गरी प्रिमियम मूल्यमा आईपीओ जारी गर्न सक्ने व्यवस्था छ । हाललाई प्रस्तावित अधिकृत पूँजीको १० प्रतिशतसम्म सर्वसाधारणलाई शेयर जारी गर्न ऊर्जा मन्त्रालयमार्फत मन्त्रिपरिषद्मा स्वीकृतिका लागि अनुरोध गरिएको हो ।