महन्थ ठाकुरसँग सहमति नदेखेपछि राजेन्द्र महत्तो नयाँ दलको गृहकार्य गर्न दिल्लीमा

१ माघ, काठमाडौं । मधेश प्रदेशमा राजनीति गरिरहेका नेताहरुले आफू अनुकुलको दल खोल्नु नयाँ विषय होइन । आफू अनुकुल नहुने वित्तिकै पार्टी फूटाएर वा छाडेर नयाँ दल निर्माण गर्न अझै पनि नेताहरु लागिरहेकै छन् । अहिले लोकतान्त्रिक समाजवादी पार्टी (लोसपा) का दोस्रो वरियताका नेता राजेन्द्र महतोले नयाँ पार्टी खोल्न गृहकार्य अघि बढाएका मात्र छैनन त्यसका लागि भारतीय नेताहरुको समर्थन जुटाउन दिल्ली पुगेका छन् ।

विगत केही महिना देखि लोसपाका अध्यक्ष महन्थ ठाकुर र महतोवीच गम्भीर विवाद बढेको छ । विवादपछि महतो नयाँ दल खोल्नतिर लागेका छन् । मधेश केन्द्रित दलको प्रभाव मधेशमा घटिरहेका बेला महतो नयाँ दलको गृहकार्यमा छन् । ठाकुसँग सहमति हनु नसक्ने देखेपछि उनले केहि समय अघिदेखिनै नयाँ दलको गृहकार्य गरिरहेका थिए । विवादकै कारण केही दिन अघि ठाकुरले बोलाएको केन्द्रीय समितिको बैठकलाई महतोले बहिस्कार गरेका थिए । पार्टी अध्यक्ष ठाकुरको कायैशलीको कारणले बैठक बहिस्कार गरेको उनले सार्वजनिक रुपमै अभिव्यक्ति दिएका थिए ।

महतो मधेसका विभिन्न जिल्ला पुगेर अघिल्लो साता काठमाडौ आएका थिए । काठमाडौ आएको केही दिनमा उनी दिल्ली पुगेका छन् । अहिले उनी दिल्लीमा रहेका छन् । मधेसमा हुँदा उनले सर्लाही, महोत्तरी, धनुषा, सिराहा, सप्तरी, सुनसरी, मोरङ लगायतका जिल्ला पुगी लोसपाका स्थानीय कार्यकर्ताहरूसँग भेट गरेका थिए । अधिकांशले ठाकुरले पार्टी चलाउन सक्दैनन, त्यसैले नयाँ पार्टी खोल्नुहोस भन्ने सल्लाह दिएपछि यसकै तयारीका लागि दिल्ली गएको स्रोतको दावी छ । ‘दिल्ली जानु भएको छ आजै वा भोलीसम्म काठमाडौ आउनु हुन्छ’, उनी निकट रहेका एक नेताले भने ।  

२०७८ भदौमा लोसपाको गठन भएको थियो । कानुन अनुसार महतोले लोसपा फुटाएर पार्टी खोल्न सक्दैनन । एउटा पार्टीबाट फुटेर बनेको पार्टी ५ वर्षसम्म फुटाउन नमिल्ने कानुनमा व्यवस्था छ । त्यसैले महतोले पार्टी नफुटाएर नयाँ पार्टी गठन गर्न सक्छन । उनले गठन गरेको नयाँ पार्टीमा लोसपाका सांसद तथा सार्वजनिक पदमा बसेका व्यक्ति भने जान सक्दैनन । किनभने उनीहरू नयाँ पार्टीमा गए उनीहरूको पद जोखिमा पर्छ । त्यसैले महतोले सार्वजनिक पदमा नबसेका व्यक्तिहरूलाई समेटेर नयाँ पार्टी खोल्ने तयारी गररहेको स्रोतले बतायो । उनले मधेश मुक्ति र मधेश प्रदेशमा स्वायत्त राज्यको अवधारणा राखेर पार्टी खोल्न लागेको पनि स्रोतको दावी छ ।