पीएम कप अन्तर्गतको तीन खेल फरक–फरक खेलमैदानमा हुँदै

२ माघ, काठमाडौं । जारी प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत आज तीन खेल हुँदैछन् । भैरहवा, कीर्तिपुर र मूलपानी क्रिकेट मैदान खेल हुने भएका छन् । 

आज भैरहवा क्रिकेट मैदानमा कर्णाली प्रदेश र सुदूरपश्चिम प्रदेशबीच खेल हुँदैछ ।

कर्णाली र सुदूरपश्चिम दुवैले आ–आफ्नो पहिलो खेलमा जित हासिल गरेर आज दोस्रो खेल खेल्ने छन । पहिलो खेलमा कर्णालीले गण्डकी प्रदेशलाई पराजित गरेको थियो भने सुदूरपश्चिम प्रदेशले लुम्बिनी प्रदेशलाई पराजित गरेको थियो ।

त्यस्तै आज अर्को खेल त्रिभुवन विश्वविद्यालय खेल मैदान, कीर्तिपुरमा कोशी प्रदेश र नेपाल पुलिस क्लबबीच हुनेछ । कोशी प्रदेशले यसअघिका आफ्ना दुवै खेलमा हार बेहोरेको छ भने पुलिस क्लबले आफ्नो पहिलो खेल जितेको छ ।

त्यसैगरी आज तेस्रो खेल बागमती प्रदेश र मधेश प्रदेशबीच मूलपानी क्रिकेट मैदानमा हुँदैछ । बागमती प्रदेशले आफ्ना यस अघिका दुवै खेलमा हार बेहोरेको छ भने मधेश प्रदेशले आफ्ना २ खेलमा एक जित र एक हार बेहोरेको छ ।