माओवादी विधान अधिवेशनमा प्रति प्रतिनिधि १ हजार उठाउने

३ माघ, काठमाडौं । नेकपा माओवादीले विधान अधिवेशनका क्रममा प्रतिनिधिबाट प्रतिव्यक्ति १ हजार रूपैयाँ उठाउने भएको छ । उसले १३ लाख रूपैयाँ उठाउने लक्ष्य लिएको छ । माओवादीको आगामी फागुन १ देखि ३ गतेसम्म राजधानीको कमलादीमा हुने तय भएको विधान अधिवेशनमा प्रति प्रतिनिधि १ हजारका दरले प्रवेश शुल्क लिने निर्णय भएको हो । 

विधान अधिवेशनमा केन्द्रीय सदस्यहरू, वैकल्पिक केन्द्रीय सदस्यहरू, केन्द्रीय सल्लाहकारहरू, केन्द्रीय ज्येष्ठ  कम्युनिस्ट मञ्चका सदस्यहरू, केन्द्रीय आयोगका सदस्यहरू, प्रदेश समितिका पदाधिकारीहरू, जिल्ला संयोजकहरू, महानगरका अध्यक्षहरू, केन्द्रीय विभागका सचिवहरू, केन्द्रीय ज.व.स.÷मोर्चाका प्रमुखहरू प्रतिनिधिहरू हुनेछन् ।  

प्रतिनिधिहरूले हल प्रवेश गर्नुभन्दा पहिले आफूले बुझाउन बाँकी लेवी र प्रवेश शुल्क अनिवार्य रूपमा बुझाउनु पर्ने माओवादीको भनाइ छ । विधान अधिवेशनअघि माओवादीले तल्ला कमिटीहरूमा मस्यौदा विधान–२०८० माथि छलफल चलाउने जनाइएको छ ।