राष्ट्रियसभा निर्वाचनको नमुना मतपत्र सार्वजनिक, आयोगले पायो ४ करोड खर्च

३ माघ, काठमाडौं । निर्वाचन आयोगले राष्ट्रियसभा निर्वाचनको नमुना मतपत्र सार्वजनिक गरेको छ । आयोगले वेबसाइटमा नमुना मतपत्र सार्वजनिक गरेको हो । नमुना मतपत्रमा उमेदवारहरूको नाम राखिएको छ ।

क्लष्टरहरूअनुसार छुट्टाछुट्टै मतपत्र छ । नमुना मतपत्रको रङ गुलाबी र निलो हरियो छ । आउँदो माघ ११ गते १९ पदका लागि चुनाव हुँदैछ ।

 यस्तै, राष्ट्रियसभा सदस्यको निर्वाचन सम्पन्न गराउन सरकारले निर्वाचन आयोगलाई चार करोड निकासा गरेको छ । अर्थ मन्त्रालयका अनुसार मन्त्रालयबाट ४ करोड ८ हजार ७०० रुपैयाँ निकासा गरिएको छ । 

निर्वाचन आयोगका प्रवक्ता शालिग्राम शर्मा पौडेलले राष्ट्रियसभाको निर्वाचनको एकीन खर्च यही महिनाभित्र प्राप्त हुने बताए । निर्वाचनको सुरक्षा निकायका लागि छुट्टै खर्चको व्यवस्थापन गरिएको छैन । नियमित सुरक्षा व्यवस्थाअनुसार सुरक्षा आवश्यक प्रबन्ध मिलाइने भएको छ ।