सुनजस्तो देखिने धातुसहित पोखरा र सिमराबाट ३ जना पक्राउ

३ माघ, बारा ।  जितपुरसिमरा उपमहानगरपालिका २ स्थित बिकास शिल चोकबाट सुन जस्तो देखिने पहेलो धातु करिब ६ सय ५८ ग्रामसहित २ जनालाई  प्रहरीले पक्राउ गरेको छ ।

पक्राउ पर्नेहरूमा जितपुर सिमरा उपमहानगरपालिका १८ बस्ने ५४ वर्षीय राधेश्याम माझी र गोरखा, गोरखा नगरपालिका १ बस्ने ३८ वर्षीय यदु कुमार विक रहेका छन ।

ईलाका प्रहरी कार्यालय सिमराबाट खटिएको प्रहरीले माझीको ज्याकेटको खल्तीबाट रूमालमा लुकाई छिपाई राखेको उक्त धातु फेला पारी उनीहरूलाई पक्राउ गरेको हो ।

यस्तै पोखरा महानगरपालिका ३० पावरहाउस नजिकबाट पाल्पा रम्बादेबी गाउँपालिका ३ हाल पोखरा महानगरपालिका १ मोहोरिया बस्ने २४ वर्षीय दिलिप गहतराजलाई प्रहरीले पक्राउ गरेको छ ।

वडा प्रहरी कार्यालय गगनगौँडाबाट खटिएको प्रहरीले भैरहवाबाट पोखरातर्फ आउँदै गरेको लु २ ख १२६ नम्बरको बसलाई जाँच गर्ने क्रममा बसमा सवार उनलाई २ वटा ढिक्का, २ वटा गोलो रिङ, २ वटा सानो सानो टुक्रामा राखेको उक्त परिमाणको धातुसहित फेला पारी पक्राउ गरेको हो ।

पक्राउ परिएकाहरु बारे प्रहरीले आवश्यक अनुसन्धान गरिरहेको जनाएको छ ।