अख्तियारको टोलीद्वारा वडाध्यक्ष १५ लाख घुससहित पक्राउ

काठमाडौं, ४ माघ । बनेपामा घुस लिएको आरोपमा एकजना पक्राउ परेका छन् । बनेपा नगरपालिका ९ वडाअध्यक्ष नृपेश बादे १५ लाख रुपैयाँ घुसहित पक्राउ परेका हुन् ।

अख्तियार दुरुपयोग अनुसन्धान आयोग टंगालबाट खटिएको टोलीले बादेलाई बुधबार घुस रकमसहित पक्राउ गरेको हो ।

अख्तियार प्रवक्ता नरहरि घिमिरेले बादेलाई भक्तपुर ठिमी नगरपालिका ३ गठ्ठाघरबाट पक्राउ गरेको जानकारी दिए । ‘उहाँलाई घुस रकम लिइसकेको अवस्थामा पक्राउ गरिएको हो,’ प्रवक्ता घिमिरेले भने । बादेको साथबाट स्रोत नखुलेको रकम पनि बरामद भएको घिमिरेले जानकारी दिए ।

बादेले घर बाटो सिफारिस गर्ने प्रयोजनको लागि घुस मागिरहेको सूचनाका आधारमा अख्तियारको टोली उनको खोजीमा पुगेको थियो ।

बादेको साथबाट जापानिज येन १० हजार, अमेरिकी डलर एक सय, हुन्डाइको आई १० कार बरामद भएको छ । कार चालक बदमबहादुर प्रधानसमेतलाई पक्राउ गरिएको घिमिरेले बताए ।

पक्राउ परेका घिमिरेलाई न्यायिक हिरासतमा राखेर अनुसन्धान थालिएको घिमिरेले जानकारी दिए।