तीव्र गतिका बलर अभिनाश बोहराको हातको शल्यक्रिया सफल !

५ माघ, काठमाडौं । नेपाली क्रिकेट टोली तथा एपीएफ क्लबका तीव्र गतिका बलर अभिनाश बोहराको हातको शल्यक्रिया सफल भएको छ । प्रधानमन्त्री कप एकदिवसीय राष्ट्रिय प्रतियोगितामा नेपाल एपीएफबाट बिहीबार टियु क्रिकेट मैदानमा मधेश प्रदेशविरुद्ध खेल्ने क्रममा उनको बायाँ हातको हत्केलामा चोट लागेको थियो ।  

स्रोतका अनुसार उक्त चोटपछि उनी वयोधा अस्पताल बल्खुमा उपचार गर्न गएका थिए । बिहीबार नै उनको शल्यक्रिया भएको छ । अब अभिनाश एक महिना मैदान बाहिर रहने छन् । अब अभिनाशको स्थान यज्ञमान कुमालले लिनेछन् । 

तर उनी पहिलो रोजाइका बलर भने होइनन् । यज्ञमानले पछिल्लो पटक एपीएफबाट पिएम कप २०१९ मा मूलपानीमा गण्डकीविरुद्ध खेलेका थिए ।  

हत्केलामा चोट लागेपछि अभिनाशले सुरुमा मैदानमै प्राथमिक उपचार गराएका थिए । फिजियो लोकेन्द्र कुँवर लगायत मेडिकल टोलीले उपचार गरेका थिए । त्यसपछि उनी मैदान बाहिर आउनु परेको थियो ।