क्षेत्रपाटीस्थित नरेश अग्रवालको गोदाममा राजश्वको छापा, स्रोत नखुलेको दुई करोडसहित तीन जना पक्राउ

५ माघ, काठमाडौं । राजश्व अनुसन्धान विभागले क्षेत्रपाटीस्थित नरेश अग्रवालको गोदाममा छापा मारेर स्रोत नखुलेको २ करोड रूपैयाँसहित ३ जनालाई पक्राउ गरेको छ ।

विभागका महानिर्देशक नवराज ढुंगानाका अनुसार, अवैध रूपैयाँसहित पक्राउ पर्नेमा नरेश अग्रवाल र उनका सहयोगीहरु छन् । बरामद रकम गन्ने काम हुँदैछ । 

अवैध विदेशी मुद्रा, हुण्डी र सुन कारोबारका संलग्न रहेको आरोपमा कपडा व्यापारी नरेश अग्रवाललाई  पक्राउ गरी अनुसन्धान थालिएको ढुंगानाले बताए । राजस्व अनुसन्धान विभागको टोलीले गोदाममा छापा मारेर उनलाई बिहिबार राती नै नियन्त्रणमा लिएको हो ।  

विभागको टोलीले उनको घरमा छापा मारी २ करोड नगद जफत गरेको छ । यो रकम कति भन्ने कुरा गन्न भने बाँकी छ । केहीबेरमा प्रहरी र राष्ट्र बैंकका अधिकारीलाई राखेर रकम गन्ने काम गरिनेछ । अग्रवाल सुन, हुन्डी र क्रिप्टोकरेन्सी कारोबारमा संलग्न भएको विभागले जनाएको छ । अग्रवालको घरबाट २ हजार अमेरिकी डलर पनि बरामद भएको विभागले जनाएको छ । 

ढुंगानाका अनुसार, बरामद रकम हुण्डी कारोबारको हुनसक्ने अनुमान छ । अग्रवाल क्रिप्टोकरेन्सीको कारोबारमा पनि संलग्न रहेको सूचना विभागसँग थियो । अग्रवालले कपडा व्यवसायको आडमा हुण्डी र नेपालमा प्रतिबन्धित क्रिप्टोकरेन्सीको कारोबार गर्दै आएको विभागले जनाएको छ ।