भारत लैजाँदै गरेकी किशोरीको उद्धार

५ माघ, बर्दिया । बर्दियामा भारत लैजाँदै गरेकी एक किशोरीको उद्धार गरेको छ ।

बाँसगढी नगरपालिका ३ कि १७ वर्षीया किशोरीलाई ललाई फकाई भारत पुर्‍याइएकोमा भारतीय सुरक्षा बल एसएसबीले उद्धार गरेको हो । एसएसबी ५९औं बाहिनी लौकाहीले किशोरी र दुई युवालाई सोधपुछ गर्दा स्पष्ट र सन्तोषजनक जवाफ नआएपछि क्याम्पमा लगिएको थियो ।

क्याम्पमा सोधपुछपछि उनीहरूले ती किशोरीलाई भारतको चेन्नई लैजान लागेको बताएका थिए । शंका लागेपछि एसएसबीले नेपाल प्रहरी लगायत मानव वेचबिखनविरुद्ध अभियानमा लागेका शान्ति पुनःस्थापना गृहलाई बुझाएका थिए ।

प्रहरीले दुई आरोपितलाई नियन्त्रणमा लिई आवश्यक कारबाही अघि बढाएको प्रहरी उपरीक्षक सुधीरराज शाहीले बताए । पक्राउ पर्नेमा बाँसगढी नगरपालिका ३ का २१ वर्षका कासिम अहम्मद र सोही ठाउँका २० वर्षीय मोहम्मद कैफ रहेका प्रहरीले जनाएको छ ।

प्रहरीले उनीहरुको साथबाट भारतीय आधार कार्ड समेत बरामद गरेको जनाएको छ ।