पहिचान पक्षधरलाई वार्तामा आउन कोशी सरकारको आग्रह, मन्त्री जबेगुको नेतृत्वमा समिति गठन

६ माघ, विराटनगर । कोशी सरकारले आन्दोलनरत पहिचान पक्षधरलाई वार्ताका लागि आग्रहगर्दै सरकारका तर्फबाट वार्ता समिति गठन गरेको छ । सरकारले भौतिक पूर्वाधार विकासमन्त्री कमलप्रसाद जबेगुको नेतृत्वमा वार्ता समिति गठन गरेको हो । 

शनिबार बसेको मन्त्रिपरिषद् बैठकले भौतिकमन्त्री जबेगुको नेतृत्वमा तीन सदस्यीय वार्ता समिति गठन गर्दै पहिचान पक्षधरलाई वार्ताका लागि आग्रह गरकेको हो । समितिको सदस्यमा पर्यटन, वन तथा वातावरणमन्त्री गणेश उप्रेती र सदस्य सचिवमा आन्तरिक मामिला तथा कानून मन्त्रालयका सचिव लक्ष्मीप्रसाद पौडेल छन् । 

समितिले कोशी प्रदेश नामको विरोधमा आन्दोलन गरिरहेको पहिचान पक्षधरसँग वार्ता गर्नेछ । १७ फागुनमा प्रदेशसभा बैठकले  प्रदेशको नाम कोशी राखेपछि पहिचान पक्षधर प्रदेश १ पुनः नामकरण संयुक्त संघर्ष समिति गठन गरी आन्दोलित छन् ।

मन्त्रीपरिषद् बैठकले प्रदेश आयोजना बैंक व्यवस्थापन कार्यविधि पहिलो संशोधन स्वीकृत, केही प्रदेश ऐनलाई संशोधन गर्ने अध्यादेश २०८० सिफारिस गर्ने र १० वर्षमुनिका बालबालिकाहरूको निःशुल्क उपचारका लागि कोशी प्रदेश बालबालिक संरक्षण नियमावली स्वीकृत गर्ने निर्णय पनि गरेको छ ।