विषयगत समितिका सभापति र सभामुख घिमिरेबीच आज संयुक्त छलफल

७ माघ, काठमाडौं । सरकारले संसदको हिउँदे अधिवेशन बोलाउने तयारी गरेपछि प्रतिनिधिसभाका सभामुख देवराज घिमिरेले विषयगत समितिका सभापतिहरुसँग संयुक्त छलफल राखेका छन् । आगामी संसद अधिेवेशन र विवषयत समितिका कामकारवाहीबारे सभामुख र सभापतिबीच छलफल हुने भएको हो । 

आइतबार बिहान ११ बजे सभामखुको कार्यकक्षमा समितिका सभापतिहरुलाई बोलाइएको छ । प्रतिनिधि सभा अन्तर्गतका १० वटा विषयगत समितिहरु छन् । ती समितिमा रहेका विधेयकहरुको अवस्था लगायतका विषयमा सभामुख घिमिरेले छलफल गर्न लागेका हुन् । 

सभामुख घिमिरले समितिमा रहेका विधेयकको अवस्था कस्तो छ र आगामी संसद अधिवेशनलाई कसरी विजनेस दिन सकिन्छ भन्ने विषयमा छलफल गर्न लागेका हुन् । सरकारले यही माघ तेस्रो साता संसदको हिउँदे अधिवेशन बोलाउने तयारी गरेको छ । त्यसलाई प्रभावकारी बनाउने विषयमा सभामुख घिमिरेले संसदीय समितिका सभापतिहरुसँग छलफल गर्न लागेका हुन् ।

संघीय संसदको यसअघि सम्पन्न वर्षे अधिवेशनयता प्रतिनिधि सभामा निर्माण व्यवसायसँग सम्बन्धित एउटा मात्रै विधेयक दर्ता भएको छ । हाल प्रतिनिधिसभामा विद्युतीय व्यापार विधेयक, राष्ट्रिय मर्यादासँग सम्बन्धित विधेयक र सम्पती शुद्धीकरणसँग सम्बन्धित विधेयक गरेर ३ वटा मात्रै विधेयक अगाडि बढ्नसक्ने अवस्थामा छन् ।