एनआईसी एसिया बैंकको वितरणयोग्य मुनाफा ऋणात्मक

७ माघ, काठमाडौं । एनआईसी एसिया बैंकको मुनाफामा ४१ प्रतिशतको गिरावट आएको छ । बैंकले सार्वजनिक गरेको चालू आर्थिक वर्षको दोस्रो त्रैमासिक वित्तीय विवरणअनुसार साउनदेखि पुस मसान्तसम्म खुद मुनाफा एक अर्ब ९० करोड ३८ लाख रूपैयाँ मात्र छ ।

गत वर्षको यस अवधिमा यस्तो मुनाफा तीन अर्ब २७ करोड ३३ लाख रूपैयाँ थियो । बैंकको मुख्य बिजनेस खुद ब्याज आम्दानी घट्नु र लोन लस प्रोभिजन बढ्नुले मुनाफा घटेको देखिन्छ । बैंकको खुद ब्याज आम्दानी गत वर्षको दोस्रो त्रैमासमा ६ अर्ब १६ करोड रूपैयाँ रहेकोमा अहिले पाँच अर्ब ५४ करोड रूपैयाँमा खुम्चिएको छ ।

त्यस्तै बैंकको लोन लस प्रोभिजन ४८ करोड रूपैयाँ छ । जबकि गत वर्षको दोस्रो त्रैमासमा बैंकले ४७ करोड ९६ लाख रूपैयाँ ‘राइट ब्याक’ गरेको थियो । बैंकको वार्षिक प्रतिशेयर आम्दानी २५ रूपैयाँ ५९ पैसा छ । गत वर्षको यस अवधिमा ५६ रूपैयाँ ७७ पैसा थियो ।

बैंकको निष्क्रिय कर्जा कुल कर्जामा १.१९ प्रतिशत छ, गत वर्षको दोस्रो त्रैमासमा यस्तो कर्जा ०.६१ प्रतिशत मात्रै थियो । त्यस्तै बैंकको सीडी रेसियो गत वर्षको पुस मसान्तसम्म ८३ प्रतिशत रहेकोमा यो पुस मसान्तसम्म ७७ प्रतिशतमा झरेको छ । यही अवधिमा बैंकको आधार दर ११ प्रतिशतबाट ९.६८ प्रतिशतमा झरेको छ ।

बैंकको औसत ब्याजदर अन्तर (स्प्रेडदर) ३.९९ प्रतिशत छ । पुस मसान्तसम्म बैंकको वितरणयोग्य मुनाफा भने ५९ करोड २२ लाख रूपैयाँ ऋणात्मक छ । बैंकले यसअघि मर्जर तथा प्राप्तिमा पाएको बार्गेन पर्चेज गेनवापत सरकारलाई ४४ करोड ४५ लाख रूपैयाँ बुझाउँदा पनि वितरणयोग्य मुनाफामा असर परेको छ ।