कुमारी बैंकको खराब कर्जा बढेर जाँदा मुनाफा घट्यो

७ माघ, काठमाडौं । कुमारी बैंकको खराब कर्जा बढेर पाँच प्रतिशत नजिक पुगेको छ । बैंकले आइतबार सार्वजनिक गरेको चालू आर्थिक वर्ष २०८०/०८१ को दोस्रो अपरिष्कृत वित्तीय विवरणअनुसार बैंकको खराब कर्जा ४.९७ प्रतिशत कायम भएको छ । गत वर्षको सोही अवधिमा बैंकको खराब कर्जा ३.१५ प्रतिशत थियो ।

खराब कर्जा बढ्दै गएपछि बैंकको मुनाफामा पनि प्रत्यक्ष असर देखिएको छ । विवरणअनुसार पुस मसान्तसम्म बैंकले ८६ करोड ७२ लाख रूपैयाँ मुनाफा आर्जन गरेको छ । गत वर्षको सोही अवधिमा बैंकले एक अर्ब एक करोड २० लाख रूपैयाँ मुनाफा आर्जन गरेको थियो । गत वर्षको तुलनामा बैंकको मुनाफा १४.३१ प्रतिशतले घटेको छ ।
 
बैंकले तीन खर्ब १८ अर्ब ७६ करोड रूपैयाँ निक्षेप संकलन गरेको छ भने दुई खर्ब ७५ अर्ब ४३ करोड रूपैयाँ कर्जा लगानी गरेको छ ।