गत वर्षको तुलनामा ग्लोबल आइएमई बैंकको मुनाफा घट्यो

७ माघ, काठमाडौं । ग्लोबल आइएमई बैंक लिमिटेडले चालू आर्थिक वर्ष २०८०/८१ को दोस्रो त्रैमाससम्ममा दुई अर्ब चार करोड २३ लाख रूपैयाँ खुद मुनाफा आर्जन गरेको छ । बैंकको दोस्रो त्रैमाससम्मको अपरिष्कृत वित्तीय विवरणअनुसार बैंकको खुद मुनाफा गत आर्थिक वर्षको सोही अवधिको तुलनामा घटेको छ ।
 
चालू आर्थिक वर्षको पहिलो ६ महिनासम्ममा गत आर्थिक वर्षको सोही अवधिको तुलनामा २६.५९ प्रतिशत कम हो । गत आर्थिक वर्षको सोही अवधिसम्ममा बैंकले दुई अर्ब ७८ करोड रूपैयाँ खुद मुनाफा कमाएको थियो ।

खुद ब्याज आम्दानी र कुल सञ्चालन आम्दानी बढे पनि इम्पेरमेन्ट चार्ज बढेसँगै बैंकको खुद मुनाफा घट्न पुगेको हो । पुस मसान्तसम्म बैंकको निक्षेप संकलन र ऋण लगानी वृद्धि भएको छ । पुसको अन्त्यसम्ममा बैंकले चार खर्ब ५४ अर्ब २४ करोड रूपैयाँ निक्षेप संकलन गरी तीन खर्ब ६४ अर्ब ७४ करोड रूपैयाँ कर्जा लगानी गरेको छ ।

पुस मसान्तसम्म बैंकको खुद ब्याज आम्दानी ३७.९९ प्रतिशत र खुद फि तथा कमिसन आम्दानी ४४.५४ प्रतिशत बढेको छ । बैंकको कुल सञ्चालन आम्दानी ३९.२२ प्रतिशत बढेको छ भने सञ्चालन मुनाफा २५.०८ प्रतिशत घटेको छ ।

बैंकको निष्क्रिय कर्जा २.९२ प्रतिशतबाट बढेर ४.६८ प्रतिशत पुगेको छ । बैंकको इम्पेरमेन्ट चार्ज एक अर्ब १२ करोडबाट बढेर चार अर्ब १३ करोड पुगेको छ । हाल बैंकको चुक्ता पुँजी ३६ अर्ब १२ करोड ८७ लाख रूपैयाँ चुक्ता पुँजी छ । बैंकको जगेडा कोषमा २२ अर्ब एक करोड ६२ लाख रूपैयाँ सञ्चित छ ।