सुरक्षाको कारण देखाउँदै भारतले रोक्यो अयोध्या जाने रेल

७ माघ, जनकपुरधाम । भारत सरकारले अनुमति नदिएपछि उत्तर प्रदेशको अयोध्यामा नवनिर्मित राम मन्दिरको प्राण प्रतिष्ठाको अवसरमा जनकपुरबाट जाने लागेको विशेष रेल नजाने भएको छ । सुरक्षाको कारण देखाउँदै भारतले अनुमति नदिएपछि जनकपुरबाट जान लागेको रेल यात्रा रद्द गरिएको छ । 

नेपाल रेल्वे कम्पनीका अनुसार सम्बन्धित निकायबाट स्वीकृति लिएर प्राण प्रतिष्ठामा जनकपुरबाट भारतीय २० बोगीको रेल जाने व्यवस्था मिलाएको थियो । शनिबार अपरान्ह ४ बजेदेखि टिकट बुकिङ खुला गरिएको उक्त रेल आइतबार बिहान अयोध्या जाने तयारीमा थियो । 

भारत सरकारले अनुमति नदिने भनेपछि रेल्वे सेवाले रेल सेवा रद्द भएको जानकारी गराएको हो । जनकपुर रेल्वेका प्रमुख प्रशासन सहायक रञ्जित ठाकुरले भारतले अनुमति नदिँदा अयोध्या जाने रेल सेवा रद्द गरिएको बताए ।