महासचिव नियुक्तिमा ढिलाई भयो भन्दै सभामुख र राष्ट्रिय सभा अध्यक्षले राष्ट्रपतिलाई लेखे पत्र

७ माघ, काठमाडौं । संसद सचिवालयका महासचिव नियुक्तिमा सभामुख देवराज घिमिरे र राष्ट्रिय सभा अध्यक्ष गणेश तिमिल्सिनाले चासो देखाएका छन् । उनीहरूले संघीय संसदको महासचिव नियुक्तिका लागि गरिएको सिफारिसबारे राष्ट्रपतिलाई पत्र पठाएर पुनः स्मरण गराएका छन् । 

सभामुख घिमिरे र अध्यक्ष तिमिल्सिनाले २५ मंसिरमा संघीय संसदको महासचिवमा पदमराज पाण्डेयलाई सिफारिस गरेका थिए । तर विवादित भएको भन्दै राष्ट्रपति रामचन्द्र पौडेलले अहिलेसम्म यसबारे निर्णय गरेका छैनन् । लामो समयसम्म पाण्डेयको नियुक्ति नभएपछि सभामुख घिमिरे तिमिल्सिनाले स्मरण पत्र पठाएका हुन् । 

राष्ट्रपतिका कानुनी सल्लाहकार बाबुराम कुँवरले सभामुखको पत्र आएको जानकार दिएका छन् ।   मंसिर २५ गते तत्कालीन महासचिव डा. भरतराज गौतमले राजीनामा दिएपछि सचिव पदमप्रसाद पाण्डेलाई महासचिव नियुक्तिका लागि गरिएको सिफारिस गरिएको थियो ।  

मंसिर २५ गते नै संसदको महासचिवमा नियुक्तिका लागि पदमप्रसाद पाण्डेको नाम सिफारिस भइसककेको छ । तर पाण्डेलाई महासचिवमा नियुक्तिका लागि भएको उक्त उक्त सिफारिस राष्ट्रपतिको कार्यालयमा किन र के कारणले रोकियो? भनेर स्मरण पत्र पठाएको संसद् सचिवालयका एक अधिकारीले जानकारी दिए । राष्ट्रपतिले उक्त सिफारिस अड्काइदिएपछि पाण्डेलाई गत मंसिर २७ गते संसद सचिवालयको कार्यवाहक महासचिव बनाइएको थियो।  

मंसिर २५ मै महासचिवमा नियुक्तिका लागि सिफारिस भए पनि राष्ट्रपति पौडेलले आवश्यक कानुनी परामर्श भन्दै अड्काइदिएका छन् । महासचिवमा पाण्डेको नियुक्तिबारे संसद र राष्ट्रपतिबीच द्वन्द्वको अवस्था देखिएको छ । यस्तो अवस्थामा संसदको नेतृत्वबाट राष्ट्रपतिलाई फेरि अर्को पत्र गएको हो । 

संविधानको धारा १०६ बमोजिम प्रतिनिधि सभाको सभामुख र राष्ट्रिय सभाको अध्यक्ष दुवैको संयुक्त सिफारिसमा पाण्डेको नाम संघीय संसदको महासचिवमा सिफारिस भएको थियो । नौ महिना कार्यकाल बाँकी रहँदै तत्कालीन महासचिव डा. भरतराज गौतमले राजीनामा दिएपछि पाण्डेलाई नयाँ महासचिवका रुपमा संसद्बाट भएको सिफारिस राजनीतिक कारणले अड्किएको हो ।