तनहुँमा ‘मिनी ट्रक’ दुर्घटनामा दुईजनाकाे ज्यान गयो

८ माघ, तनहुँ । तनहुँमा ‘मिनी ट्रक’ दुर्घटना हुँदा दुई जनाको मृत्यु भएको छ । देवघाट गाउँपालिका २ कोटबैदीको भित्री सडकमा आइतबार राति ट्रक दुर्घटना हुँदा दुई जनाको मृत्यु भएको हो ।

दमौलीबाट छिपछिपे तर्फ जाँदै गरेको ग१ख ४१८१ नम्बरको मिनी ट्रक सडकदेखि अन्दाजी पाँच सय मिटर तल खस्दा ट्रकमा सवार दुई जनाको मृत्यु भएको जिल्ला प्रहरी कार्यालय तनहुँले जानका दिए ।  मृत्यु हुनेमा देवघाट ३ दगाराका ६५ वर्षीय नरबहादुर गुरुङ र ४५ वर्षीया बिमाया गुरुङ रहेको प्रहरी नायब उपरीक्षक मोहनबहादुर खाँणले बताए । ट्रक चालकको खोजी भइरहेको उनले बताए ।

 ट्रक दुर्घटनामा घाइते भएका दुवै जनालाई उपचारका लागि दमौली अस्पताल ल्याइएकामा आज बिहान चिकित्सकले मृत घोषणा गरेको प्रहरीले जनाएको छ  ।