पशुपति विकास कोषकी कार्यकारी निर्देशक लक्ष्मी पुनलाई तत्काल काम नगराउन अदालतको आदेश

८ माघ, काठमाडौं । उच्च अदालत पाटनले हालै नियुक्ति पाएकी पशुपति क्षेत्र विकास कोषकी नवनियुक्त कार्यकारी निर्देशक लक्ष्मी पुनलाई कामकाज नगर्न/नगराउन अन्तरिम आदेश जारी गरेको छ । उनको नियुक्ति विवादित भएको भन्दै उच्च अदालत पाटनमा उजुरी परेको थियो ।  

न्यायाधीशहरू ऋषिराम दवाडी र श्यामकुमार भट्टराईको इजलासले उनको नियुक्ति तत्कालका लागि कार्यान्वयन नगर्न अन्तरिम आदेश जारी गरेको हो । योग्यता र मापदण्ड नपुगेको व्यक्तिलाई नियुक्त गरिएको भन्दै भरत मरासिनीले २६ पुसमा कार्यकारी निर्देशक पुन विरुद्ध उच्च अदालत पाटनमा रिट निवेदन दर्ता गरेका थिए ।

गत ४ पुसमा पशुपति क्षेत्र विकास कोषको सञ्चालक परिषदले पुनलाई कार्यकारी निर्देशकमा नियुक्त गरेको थियो । उनको नियुक्तिलाई लिएर संसदीय समितिमा पनि चर्को विरोध भएको थियो । अदालतले कोषको कार्यकारी निर्देशकको पदमा काम नगराउन भनेको हो ।