जनमतले चेतावनी दिएपछि मधेस कृषि विश्वविद्यालयको शिलान्यास स्थलमा सुरक्षाकर्मी परिचालन

८ माघ, राजविराज । मधेस कृषि विश्वविद्यालयको शिलान्यास कार्यक्रम विवादीत बनेको छ । जसपाका अध्यक्ष उपेन्द्र यादवलाई सहभागी गराएर शिलान्यास गर्न लागिएको भन्दै जनमत पार्टी विरोधमा उत्रिएपछि विश्वविद्यालयको शिलान्यास कार्यक्रमस्थलमा उच्च सुरक्षा व्यवस्था गरिएको छ ।

जनमत पार्टीले शिलान्यास रोक्न भनेको छ । तर जसपाका नेताहरुले शिलान्यास गरेरै छाड्ने तयारी गरेपछि त्यहाँ झडपको स्थिति बनेको छ । अहलिे सो क्षेत्रमा नेपाल प्रहरी र सशस्त्र प्रहरी व्यापक रुपमा परिचालन गरिएको छ । अहिले शिलान्यासस्थलमा सुरक्षाकर्मीहरु अधिक मात्रामा छन् । 

जनमत पार्टीको विरोधकाबीच आज सप्तरीको राजविराजमा कृषि विश्वविद्यालयको शिलान्यास हुन लागेको हो । राजविराज नगरपालिका १३ मा करिब १२ विघा जग्गामा विश्वविद्यालयको आफ्नै भवन निर्माणको लागि शिलान्यास हुन लागेको हो । 

आज जसपा अध्यक्ष उपेन्द्र यादव, मुख्यमन्त्री सरोजकुमार यादव र शिक्षा तथा संस्कृति मन्त्रीले संयुक्त रुपमा भवन शिलान्यास गर्ने विश्वविद्यालयका रजिष्ट्रार भगवान ठाकुरले बताए । मुख्यमन्त्री सरोजकुमार यादवले आजैको मितिमा १२ बजेर ४० मिनेटमा शिलान्यास गर्ने निर्णय गरेकाले शिलान्यास हुने बताए ।

शिलान्यासका लागि जसपाका नेता कार्यकर्ता, मधेशका मुख्यमन्त्रीसहित जसपाका मन्त्रीहरु राजविराज पुगेका छन् ।

जनमत पार्टीबाट मधेश प्रदेशमा शिक्षामन्त्री बनेका महेश प्रसाद यादवले आइतबार विज्ञप्ति जारी गरी भवन शिलान्यास कार्यक्रम स्थगित गर्न भनेका थिए । ‘कार्यक्रम नरोकेमा कुनै किसिमको अप्रिय घटना घटेमा त्यसको जिम्मेवारी मन्त्रालय नहुने विश्वविद्यालयको भिसी, रजिष्ट्रार हुने जानकारी समेत गराउन चाहन्छु’, मन्त्री यादवले जारी गरेको वक्तव्यमा उल्लेख छ ।