पार्टीको आम्दानी घटिरहेको देखाउने माओवादीले कसरी किन्यो ५ करोड ७७ लाखमा ८ आना जग्गा ?

८ माघ, काठमाडौं । पार्टीको वार्षिक आम्दानी घटिरहेको विवरण दिएको नेकपा माओवादी केन्द्रले हालै मात्र पार्टी केन्द्रीय कार्यालय पेरिसडाँडामा थप ८ आना जग्गा किनेको छ । पार्टी कार्यालय साँघुरो भएको भन्दै माओवादीले यो जग्गा खरिद गरिएको जनाएको छ । प्रायः जसो पार्टीले देखाउने आम्दानी विवादित रहँदै आएका छन् । पार्टीका कार्यकर्ता, सांसद र मन्त्री मात्र पार्टीको आम्दानीका मुख्य स्रोत हुन् ।  

माओवादीले हालै ५ करोड ७७ लाख २८ हजार ७ सय ५० रूपैयाँमा केन्द्रीय कार्यालयको मूलगेट बाहिरको ८ आना जग्गा खरिद गरेको हो । यो विषय पार्टीको आन्तरिक लेखा परीक्षणको वार्षिक वित्तीय विवरणमा पनि उल्लेख छ । अहिले नेकपा माओवादी सरकारको नेतृत्व गरिरहेको छ । माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्री छन् । 

माओवादीको वित्तीय विवरणमा गत वर्षभन्दा यो वर्ष आम्दानी घटेको देखिएको छ । पार्टी सदस्यता, लेबी, नवीकरण, चन्दा, सहयोग, प्रकाशन बिक्री, बैंकको ब्याज गरी गरी चालू आर्थिक वर्षमा ३ करोड ४८ लाख ४४ हजार ८ सय ४३ रूपैयाँ मात्र माओवादीको आम्दानी छ । यसरी हेर्दा हालै मात्र उसले ५ करोड ७७ लाख २८ हजार ७ सय ५० रूपैयाँ जग्गामा हालेको पैसा कहाँबाट आयो भन्ने प्रश्न उठाउँछ । 

माओवादीले पार्टीको अधिवशेन, सम्मेलन, प्रशिक्षण, निर्वाचन, कार्यालय संचालन र कर्मचारीको तलब गरी ३ करोड ८१ लाख ६० हजार ३ सय ६९ रूपैयाँ खर्च देखाएको छ । जसमा सदस्यता, लेबी र नवीकरणबाट तीन करोड ४३ लाख ८५ हजार ३ सय छ । उसले जम्मा १० हजार मात्र चन्दा र सहयोग प्राप्त भएको देखाएको छ । 

पार्टीको पूँजीगत खर्च र लगानीमा जग्गा खरिदमा सबैभन्दा बढी ५ करोड ७७ लाख २८ हजार ७ सय ५० रूपैँया भएको छ । माओवादी केन्द्रीय कार्यालय पेरिसडाँडा रहेको पाँच रोपनी जग्गा र त्यसमा बनेको तीन तले भवनसहित जम्मा १२ करोड ३७ लाख ७३ हजार ५ सय ७३ रूपैँया बराबर सम्पत्ति देखिएको छ । 

अघिल्लो आर्थिक वर्षमा १२ करोड २६ लाख ४ हजार ४ सय ६८ रूपैँया सम्पत्ति लेखापरीक्षण प्रतिवेदनमा जनाइएको छ । माओवादीको नाममा एभरेष्ट बैंक, ग्लोबल बैँकमा गरी १६ लाख ९२ हजार ९ सय ९७ रूपैँया मौज्दात रहेको देखिन्छ । वित्तीय विवरणको अनुसूची १२ मा पुँजीगत खर्च र लगानी शीर्षकमा उक्त जग्गा खरिद गरेको देखाइएको छ । 

पार्टी कार्यालय भवनको बायाँपट्टि क्यान्टिनसँग जोडिएको जग्गा खरिद गरिएको हो । माओवादीले उक्त जग्गा वरिष्ठ अधिवक्ता देवराज कटुवालबाट किनेको हो । यसअघि उनीबाटै १२ आना किनिसकेको छ । माओवादीले २०६५ सालमा २ रोपनी ८ आना जग्गासहितको भवन राष्ट्रिय वाणिज्य बैंक केन्द्रीय कार्यालयले गरेको लिलामीबाट सकारेको थियो ।  त्यतिबेला माओवादीले सहकारीबाट ऋण र चन्दाबाट २ करोड ७४ लाखमा २ रोपनी ८ आना जग्गा बैंकबाट सकारेको माओवादी नेताको भनाइ छ ।