स्याङजा जिल्ला सम्मेलनको निम्तो पत्रलाई लिएर कांग्रेसको केन्दीय तहमै भाडभैलो, शेखर, विश्व र गगन नजाने पक्का

८ माघ, काठमाडौं । नेपाली कांग्रेसको स्याङजा जिल्ला सम्मेलनको निम्तो पत्रमा राखिएको मर्यादाक्रमलाई लिएर पार्टीको नेतृत्व तहमै विवाद देखिएको छ । जिल्ला पार्टी कार्यालय स्याङजाबाट माघ १० गते जिल्ला सम्मेलन गर्ने भन्दै पठाएको निम्तो पत्रमा पार्टीका वरिष्ठ नेता एवं सांसद डा. शेखर कोइरालाको नाम अन्तिम लाइनमा राखिएको छ । सबै निम्तालुकाे नामकाे अगाडि मा. राखिएपनि उनको नामको अगाडि माननीयसमेत राखिएको छैन ।   

जिल्ला सचिव दामोदर लम्सालले हस्ताक्षर गरी पठाएको निम्तो पत्रमा पार्टीका शीर्ष नेता एवं पूर्वउपसभापति गोपालमान श्रेष्ठ पनि पछाडिको लाइनमा छन् । उनले स्याङजा कांग्रेसको मात्र नभएर सिंगो कांग्रेस बनाउन आफूले खेलेको भूमिकाको कदर नभएको बताएका छन् । उनले सभापति देउवापछि आफू नै वरिष्ठ नेता भएको दावी गर्दै आएका छन् । पार्टी नेताको हिसाबमा उनी पुराना नेता हुन् । यो निम्तो पत्रलाई लिएर स्याङजा कांग्रेसमा पनि भाँडभैलो सुरु भएको छ । 

स्याङजा कांग्रेसकाे संस्थापन समूह र इतर समूह बीच यही विषयलाई लिएर घम्साघम्सी मात्र भएको छैन, केन्द्रीय तहमा पनि विवाद निकालेको छ । जिल्ला सभापति राजु थापा पार्टीको पूर्णबहादुर खडका खेमाका हुन् । अहिले उपसभापति पूर्णबहादुर खड्का र नेता शेखर कोइरालाबीच को वरिष्ठ नेता भन्नेमा विवाद छ । यसैले पनि सभापति थापाले शेखर कोइरालालाई अन्तिम वक्ताको रुपमा बोलाएको कांग्रेस नेताहरू बताउँछन् । थापाले जिल्लाकै पुराना नेता गोपालमानलाई पनि अमर्यादित ढंगले निम्तो दिएको भन्दै कांग्रेस संस्थापन पक्षले नै असन्तुष्टि जनाएकाे छ । 

गण्डकी प्रदेशले डा. शेखर कोइरालालाई सभापति देउवा पछाडि दोस्रो मर्यादाक्रममा राखेर प्रदेश सम्मेलन सम्पन्न गरेको थियो । तर स्याङ्जा काग्रेसका सचिव लम्सालले मर्यादाक्रम लत्याउँदै सबै नेतालाई माननीय लेख्दा कोइरालालाई माननीयसम्म नलेखेर ठूलो अपमान गरेको नेताहरू बताउँछन् । लुम्बिनी कांग्रेसले पनि कोइरालालाई देउवा पछाडिको नेताका रुपमा आमन्त्रण गरेको थियो । पछिल्लो समय सभापति देउवाले आफू उपस्थित प्रायः कार्यक्रममा कोइरालालाई आफूपछिको नेता मान्दै आएका छन् । 

उपसभापति खड्का र कोइरालाबीच अहिले कांग्रेसका सभापति देउवापछिको बरियतामा को भन्ने विवाद कायमै रहेपनि देउवाले कोइराला नै हो भन्ने कुरा विभिन्न कार्यक्रममा देखाइसकेका छन् । कांग्रेस विधानमा वरिष्ठ नेताको पद नभएपनि कांग्रेस पार्टीमा परम्परागत रूपमा यो सम्मान दिने गरिएको छ । यसअघि गिरिजाप्रसाद कोइरालाको पालादेखि नै यस्तै हुँदै आएको छ ।

यसअघि कांग्रेसमा सभापतिको प्रतिस्पर्धामा हारेका व्यक्तिलाई वरिष्ठ नेता मानिँदै आएको थियो । देउवाले आफू गिरिजाप्रसाद र सुशील कोइरालासँग सभापतिमा हारेपछि वरिष्ठ नेताको पगरी लिदै आएका थिए भने अघिललो पटक आफूसँग सभापतिको प्रतिस्पर्धामा हारेका रामचन्द्र पौडेललाई पनि वरिष्ठ नेताको पगरी थमाएका थिए । तर १४ औं महाधिवेशनपछि भने देउवाले कांग्रेसको त्यो परम्परागत मान्यता र संस्कृतिलाई कुल्चन थालेका छन् ।  

स्याङजा कांग्रेसको निम्तो पत्र नै विवादित भएपछि १० गते उक्त सम्मेलनमा जाने कि नजाने भन्ने नेताहरूमा दुविधा सुरु भएको छ । कानुन मन्त्रीसमेत रहेका पार्टी उपसभापति धनराज गुरुङ निम्तोपत्र अनुसार जिल्ला सम्मेलनमा सहभागी हुने कि नहुने भन्ने दुविधामा देखिएका छन् । 

अन्तिममा निम्तो दिइएका डा. शेखर कोइरालाले स्याङजा सम्मेलनमा सहभागी नहुने जनाइसकेका छन् । पार्टी महामन्त्रीहरू पनि सम्मेलनमा उपस्थित नहुने भएका छन् । महामन्त्री गगन थापाले निम्तो पत्र अनुसार स्याङजा सम्मेलनमा नजाने भन्ने निर्णय नै गरेका छन् । अर्को महामन्त्री विश्वप्रकाश शर्माकाे त्यो दिन झापा जाने कार्यक्रम छ । निम्तो पत्र अनुसार पार्टीमा निकै ठूलो विवाद ल्याउने भएपछि महामन्त्रीहरूले स्याङजा नजाने मनस्थिति बनाएका हुन् ।  

राष्ट्रिय सभा निर्वाचनलाई लिएर सत्ता गठबन्धनले १० गते झापा संयुक्त कार्यक्रम राखेको छ । यस कार्यक्रममा गठबन्धनका शीर्ष नेताहरू उपस्थित हुने भनिएको छ । झापा जानुपर्ने भएमा सभापति देउवा पनि स्याङजा छाडेर झापा जाने छन् । कृष्णप्रसाद सिटौलालाई जिताउन गठबन्धनले कार्यक्रम राखेको हो । महामन्त्री विश्वप्रकाश शर्मा पनि उक्त दिन झापामै रहने बताइएको छ । आफ्नै जिल्लाको सम्मेलन भएपनि गोपालमानले सुरुमै असन्तुष्टि जनाएका छन् । यसैले १० गतेको कांग्रेसको जिल्ला अधिवेशन उपसभापति खड्का मात्र सहज रुपमा उपस्थित हुने देखाएको छ ।