जनताका सुझाव र पार्टीले अनुभूत गरेका विषयमा एमालेद्वारा सरकारको ध्यानाकर्षण

९ माघ, काठमाडौं । नेकपा एमालेले सरकारलाई जनताको सुझाव र माग समेटिएको ध्यानाकर्षण पत्र बुझाएको छ । प्रधानमन्त्री पुष्पकमल दाहाल प्रचण्डलाई बालुवाटार पुगेर नेकपा एमालेका अध्यक्ष केपी शर्मा ओली नेतृत्त्वको एमाले प्रतिनिधिमण्डलले ध्यानाकर्षण बुझाएको हो ।

एमालेले ७५१ बुँदे मागसहितको ध्यानाकर्षण पत्र सरकारलाई बुझाएको हो । गत मंसिर १४ गतेदेखि पुस १ गतेसम्म गरिएको संकल्प यात्राको क्रममा स्थानीयबाट प्राप्त भएका सुझाव सम्बोधन गर्न माग गर्दै एमालेले प्रधानमन्त्री प्रचण्डलाई ध्यानाकर्षण पत्र बुझाएको हो ।

झुलाघाटदेखि चिवाभञ्ज्याङसम्मको यात्रापछि जनताका सुझाव र पार्टीले अनुभूत गरेका विषयमा प्रधानमन्त्रीको ध्यानाकर्षण गराइएको नेता प्रदिप ज्ञवालीले जानकारी दिए । विभिन्न क्षेत्रबाट प्राप्त भएका सुझाव हामीले सरकारलाई बुझाएका छौँ, जसलाई हामीले जनताको नासो हो भनेका छौँ । यसको संरक्षण गर्न सरकारको ध्यानाकर्षण गराएका हौँ ।

एमालेको उक्त संकल्प यात्राका क्रममा ७५१ वटा माग आएको जनाएको छ । नेता ज्ञवालीका अनुसार ४६ वटा क्षेत्रका सबै प्रदेशबाट मागहरु आएका छन् । एउटा मागमा एक हजार ४ सय बढीको पनि हस्ताक्षर छ । एमाले नेताहरुसँग प्रधानमन्त्री दाहालले ध्यानाकर्षण पत्र ‘दराजमा थन्किन पाउने छैनन्’ भनी आश्वस्त तुल्याएका थिए ।