फेदीखोला गाउँपालिकामा ‘हातमा होइन खातामा’ कार्यक्रम सुरु

९ माघ, स्याङजा । फेदीखोला गाउँपालिकासहित भित्रका विद्यालयमा अध्ययन गर्ने प्रत्येक विद्यार्थीको बैङ्क खाता खोल्ने कार्यक्रम सुरु गरिएको छ । प्राइम कर्मर्सियल बैङ्कसँगको सहकार्यमा ‘आजलाई होइन भोलिलाई, हातमा होइन खातामा’ अभियान सुरु गरेको हो ।

अभियान अन्तर्गत पालिकाले १०० रूपैयाँ र बैङ्कले १०० रुपैयाँगरी विद्यार्थीको खातामा २०० रुपैयाँ जम्मा गर्ने फेदीखोला गाउँपालिकाका अध्यक्ष घनश्याम सुवेदीले जनाएको छ । सानै उमेरदेखि वित्तीय साक्षरताबारे ज्ञान दिने उद्धेश्यले अभियान सुरु गरेको उनले बताए । 

बचत गर्ने बानीको सुधार, बालबालिकाको सुनौलो भविष्यको आधार भन्ने नाराका साथ फेदीखोला गाउँपालिकाले अध्यक्ष सुवेदीले बताए । उनले भने, ‘हातमै पुग्दा उतिखेरै अनावश्यक ठाउँमा खर्चिने प्रबल सम्भावना हुने र बैंङ्किङ प्रणालीमा जाँदा विद्यार्थीको वित्तीय भविष्य उज्जवल हुने छ ।’ 

गाउँपालिका, विद्यालय, संघसंस्था, अक्षयकोषदाता लगायतका विभिन्न स्रोतमार्फत आउने छात्रवृत्ति एवम् सहयोग रकम विद्यार्थीको खातामा जम्मा गर्दा बचत गर्ने बानीको विकास हुने पालिकाले जनाएको छ । साथै अभिभावकले गर्ने खर्चको केही रुपिया अनिवार्य  आफ्ना छोराछोरीको खातामा छुट्याउनुपर्ने जनाएको छ ।

अभियान सिद्धार्थ माध्यमिक विद्यालयमबाट सुरु गरिएको हो । कक्षा ९ का ५५ जना विद्यार्थीहरुको खाता खोलेर अभियान गरेको हो ।