तास खेलिरहेका १६ जना पक्राउ

१० माघ, काठमाडौं । काठमाडौं महानगरपालिका ७ सिफलमा तास खेलिरहेको अवस्थामा १० जनालाई मंगलबार साँझ प्रहरीले पक्राउ गरेको छ । तनहुँ घर भएकी ५४ वर्षीया रुक्मा थापाको कोठामा तास खेल्दै गरेको अवस्थामा उनीहरूलाई पक्राउ गरिएको प्रहरी वृत्त गौशालाको टोलीले पक्राउ गरेको हो । प्रहरीले उनीहरूको साथबाट गद १ लाख ९३ हजार २ सय रूपैयाँ र ८ बुक ताससहित बरामद गरेको छ ।

यस्तै ओखलढुंगाकाे सिद्धिचरण नगरपालिका ११ मिलनचोकमा तास खेल्दै गरेको अवस्थामा ६ जना पक्राउ परेका छन् । सोही वडाका ५५ वर्षीय कोटिका बहादुर गिरीको माया होटलमा तास खेलिरहेको अवस्थामा गिरीसहित ६ जनालाई पक्राउ गरिएको जिल्ला प्रहरी कार्यालयले जानकारी दिए । 

जिल्ला प्रहरी कार्यालय ओखलढुंगाबाट खटिएको प्रहरीले उनीहरूलाई नगद ३४ हजार ६ सय २० रूपैयाँ र ३ बुक ताससहित पक्राउ गरेको हो ।

दुवै घटनाबारे थप अनुसन्धान भइरहेको प्रहरीले जनाएको छ ।