जिपले ठक्कर दिँदा ६४ वर्षीया महिलाकाे ज्यान गयाे

१० माघ, बझाङ । बझाङमा जिपको ठक्‍करबाट गम्भीर घाइते भएकी एक महिलाको ज्यान गएको छ।

केदारस्युँ गाउँपालिका ४ बागथलाकी ६४ वर्षीया महेश्वरीदेवी मल्लको मृत्यु भएको प्रहरीले जनाएको छ।

उनलाई बुधबार बिहान ९ बजे सडक नजिक धारामा पानी भर्न जाँदा जिपले ठक्‍कर दिएको थियो। जिपले ठक्‍कर दिँदा मल्लको टाउको र छातीमा चोट लागेको थियो ।

घाइते मल्लको राेयल प्राथमिक स्वास्थ्य केन्द्र देउरामा सामान्य उपचारपछि थप उपचार गर्न धनगढी लैजाँदै गर्दा बाटोमै मृत्यु भएको हो।

बित्थडचिर गाउँपालिका ६ का २४ वर्षीय चालक विशालसिंह स्याडालाई प्रहरीले नियन्त्रणमा लिएर अनुसन्धान थालेको छ।