बाहिरको भिड र सामाजिक सञ्जाल हेरेर हुने न्याय सम्पादनले अराजकता निम्त्याउँछः प्रधानमन्त्री

११ माघ, काठमाडौं । प्रधानमन्त्री पुष्पकमल दाहाल प्रचण्डले न्यायलयबाट बाहिरको भिड हेरेर न्याय सम्पादन हुने गरेको भन्दै यसलाई सच्याएर अगाडी बढुनपर्ने बताएका छन् । उनले यदाकदा न्याय सम्पादनमा यस्ता प्रबृति देखिएको भन्दै यसलाई निरुत्साही गर्नुपर्ने बताएका छन् । 

संविधानको पालना र संघीय लोकतान्त्रिक गणतन्त्रलाई संस्थागत गर्नु राज्यका सबै अंगका साथै सरोकारवाला सबैको दायित्व भएको उनको भनाइ छ । विहीवार प्रधानमन्त्री निवास वालुवाटारमा पूर्वन्यायाधिश समाजका पदाधिकारीहरुसँगको छलफलमा प्रधानमन्त्रीले सो कुरा बताएका हुन । 

पूर्वन्यायाधिश समाजका अध्यक्ष टोपबहादुर सिंहसहितका पूर्वन्यायधिशहरुसँगको छलफलमा प्रधानमन्त्रीले अहिले केही व्यक्ति समाजको हारमोनी विगार्न र राम्रो कामलाई पनि नराम्रो भन्दै प्रचार गर्न लागि परेको भन्दै संविधान र कानूनको पालना गर्न लगाउन पूर्वन्यायाधिशहरुको भूमिकासमेत महत्वपूर्ण रहने वताए । 

प्रधानमन्त्रीले पूर्वन्यायाधिशहरुले विगतमा संविधान र कानूनमाथि आक्रमण हुँदा आवाज उठाएको बताउँदै आगामी दिनमा पनि राज्यका विभिन्न अंग र निकायले गर्ने काममा संविधान र कानूनको पालना भए नभएको बारे निरन्तर निगरानी गरिरहनु पर्ने औल्याएका छन । प्रधानमन्त्रीले राज्यका जिम्मेवार पदमा बसेका व्यक्तिहरुले भिड हेरेर वा सामाजिक सञ्जालका धारणा हेरेर निर्णय गर्न नहुने भन्दै संविधान र कानूनको पूर्ण पालना गरेर त्यसका आधारमा मात्र निर्णय गर्नुपर्नेसमेत बताए ।

प्रधानमन्त्रीसँगको छलफलमा पूर्वन्यायाधिशहरुले राज्यको कार्यकारी प्रमुखका नाताले प्रधानमन्त्रीले अहिलेको व्यवस्था सुदृढ गर्न तथा संविधान र कानूनको पालना गराउन भूमिका खेल्नुपर्ने सुझाव राखेका थिए ।