राष्ट्रियसभा निर्वाचनमा ६० प्रतिशत मतदान सकियो

११ माघ, काठमाडौं । निर्वाचन आयोगले बिहान ९ बजेदेखि सुरु भएको राष्ट्रियसभा सदस्य निर्वाचनको मतदानमा ६० प्रतिशत मत खसिसकेको जनाएको छ । सातै प्रदेशमा मतदान स्थलहरू ६० प्रतिशत मतदान भइसकेको छ । 

निर्वाचन आयोगले ११.३० बजेसम्म ६० प्रतिशत मतदान सकिएको जनाएको हो । आयोगका प्रवक्ता एवं सहसचिव शालिग्राम शर्मा पौडेलले अहिलेसम्म ६० प्रतिशत मतदान सकिएको जानकारी दिए । सातै प्रदेशका मतदान केन्द्रमा मतदान जारी रहेको उनले बताए । आयोगले मतदानको समय बिहीबार अपराह्न ३ बजेसम्मको लागि तोकेको छ ।  
 
मतदान सकिएपछि मुचुल्काको काम गरिने र त्यसपछि मतगणना गर्ने स्थलमा सुरक्षित साथ पुर्याएपछि मतगणना सुरु गरिने प्रवक्ता पौडेलले बताए । मुख्य निर्वाचन अधिकृतले सर्वदलीय बैठक राखेपछि मात्रै मतगणना सुरू हुनेछ । आजै मतगणना सुरू भई निर्वाचन परिणाम आउने उनले बताए ।  

राष्ट्रियसभा निर्वाचनका लागि ८ वटा दलका ५१ जनाले उम्मेदवारी दिएका छन् । १९ जना राष्ट्रियसभा सदस्यको फागुन २० गते पदावधि सकिँदैछ । राष्ट्रियसभा सदस्य निर्वाचन ऐन, २०७५ बमोजिम पद रिक्त हुनुभन्दा ३५ दिन अवागै निर्वाचन गरिसक्नुपर्ने कानुनी व्यवस्था छ । त्यस अनुसार आयोगले बिहीबार निर्वाचन गराएको हो ।