गण्डकीमा २३० मध्ये २१० मत खस्यो

११ माघ, पोखरा । राष्ट्रियसभा निर्वाचनअन्तर्गत गण्डकीमा प्रदेशसभाका ६० र प्रदेशका ११ जिल्लामा रहेका ८५ वटा पालिकाका प्रमुख र उपप्रमुख एक सय ७० गरी कुल दुई सय ३० जना मतदाता रहेका छन् । जारी मतदानअन्तर्गत ११ः३० बजेसम्म दुई सय १० जनाले मतदान गरिसकेका छन् । 

निर्वाचनमा प्रदेशसभाका ६० मध्ये ५० र स्थानीय तहका एक सय ७० मध्ये एक सय ६० जनाले मतदान गरिसकेका छन् । राष्ट्रियसभाअन्तर्गत गण्डकीबाट प्रतिनिधित्व गर्ने तीन सदस्यको कार्यकाल आउँदो २० फागुनमा सकिँदै छ । 

तीन पदका लागि गण्डकीमा आठजना उम्मेदवार रहेका छन् । सत्तागठबन्धनका तर्फबाट तीन सीटमध्ये दुई सिटमा नेपाली कांग्रेस र एक सीटमा माओवादीका तर्फबाट उम्मेदवार बनेका छन् । 

सत्तागठबन्धनमा सीट भाग लगाउने क्रममा तीन क्लस्टरमध्ये कांग्रेसको भागमा परेको अन्य क्लस्टरमा गोरखाका किरणबाबु श्रेष्ठ, अपांंगता–अल्पसंख्यक क्लस्टरमा तनहुँका पदमबहादुर परियार र माओवादीको भागमा परेको महिला क्लस्टरमा पर्वतकी मनरुपा शर्मा उम्मेदवार छन् ।

यसैगरी, नेकपा एमालेले अन्य क्लस्टरमा स्याङ्जाका चक्रबहादुर पराजुली, अपांगता–अल्पसंख्यक क्लस्टरमा मुस्ताङका हेमन्त शेरचन र महिला क्लस्टरमा गोरखाकी सम्झना देवकोटालाई उम्मेदवार बनाएको छ । त्यसैगरी, राष्ट्रिय प्रजातन्त्र पार्टीका तर्फबाट अन्य क्लस्टरमा कास्कीका रोमबहादुर भण्डारी र महिला क्लस्टरमा तनहुँकी गौमाया श्रेष्ठ चुनावी मैदानमा छन् ।

गण्डकीको निर्वाचनमा प्रदेशसभाका ६० र प्रदेशका ११ जिल्लामा रहेका ८५ वटा पालिकाका प्रमुख र उपप्रमुख एक सय ७० गरी कुल दुई सय ३० जना मतदाता छन् । निर्वाचनमा प्रदेशसभाका एक मतदाताको मतभार ५३ र पालिकाको एक मतको मतभार १९ गरी गण्डकीको कुल मतभार ६ हजार चार सय १० छ ।