क्यानडा पठाईदिन्छु भनी ठगी गर्ने ६ जना पक्राउ

११ माघ, कास्की (पोखरा) । क्यानडा पठाईदिन्छु भनी ठगी गरेको अभियोगमा ६ जनालाई  प्रहरीले पक्राउ गरेको छ ।  पक्राउ पर्नेहरूमा पोखरा महानगरपालिका १३ पाटनवेशीकी ६५ वर्षीया पार्वती सुनार, पोखरा महानगरपालिका ९ महेन्द्रपुलकी ३७ वर्षीया रिता सुनार, स्याङ्जा फेदिखोला गाउँपालिकाकी ३ की ३२ वर्षीया सिमा सुनार, काठमाडौं महानगरपालिका १४ कलंकीका ३८ वर्षीय प्रदिप उपाध्याय, क्यानडा अलवर्ट राज्य क्यालगोरी सिटी स्थायी वतन भएका ४५ वर्षीय राकेश जैसवाल र भारत मध्य प्रदेश भोपाल नगरका ३२ वर्षीय ईस्मित कौर रहेका छन ।

पोखरा महानगरपालिका १० बुद्धचोकस्थित एक होटलमा क्यानडा लैजान्छु भनी विभिन्न प्रलोभन देखाई अन्तर्वार्ता लिन विभिन्न व्यक्तिलाई बोलाएको भन्ने सूचनाको आधारमा जिल्ला प्रहरी कार्यालय कास्कीबाट खटिएको प्रहरीले उक्त कार्यमा संलग्न उनीहरूलाई अन्तर्वार्ता लिई रहेको अवस्थामा फेला पारी पक्राउ गरेको हो । 

पार्वती सुनार समेतले छोरी क्यानडामा छ सिधै क्यानडाको भिषा निकाली दिन्छ, विदेशबाट अन्तर्वार्ता लिन मानिस आएका छन भनी प्रलोभन देखाई क्यानडा जानको लागि प्रतिव्यक्ति ३० लाख रूपैयाँ लाग्ने, उक्त रकम अन्तर्वार्ता पास भए पछी दिनु पर्ने र अन्तर्वार्ताको लागि प्रतिव्यक्ति २ हजार रूपैयाँ उठाई अन्तर्वार्ता लिएको प्रारम्भिक अनुसन्धानको क्रममा खुल्न आएको छ ।

उनीहरूमाथि कास्की जिल्ला अदालतबाट ठगी सम्बन्धी मुद्दामा ५ दिन म्याद थप अनुमति लिई प्रहरीले आवश्यक अनुसन्धान गरिरहेको छ ।