कृष्ण महरा पुत्र राहुललाई थुनामा पठाउने आदेश उच्च अदालतबाट पनि सदर

 
११ माघ, काठमाडौं । भेपमार्फत् ९ किलो सुन तस्करी प्रकरणमा पक्राउ परेका राहुल महरालाई उच्च अदालत पाटनले पुर्पक्षका लागि थुनामै राख्न आदेश दिएको छ।  यो आदेशसँगै भेप प्रकरणमा पक्राउ परेका राहुल महरा थुनामा नै रहने भएका छन् ।

बिहीबार न्यायाधीशहरू अन्जु उप्रेती ढकाल र दिपेन्द्र अधिकारीको इजलासले उनी र अर्का अभियुक्त लोकेन्द्रकुमार पौडेललाई जिल्ला अदालत काठमाडौंले गरेको आदेश सदर गरेको हो । राहुल पूर्वसभामुख एवं नेकपा माओवादी केन्द्रका उपाध्यक्ष कृष्णबहादुर महराका छोरा हुन्।  

यसअघि काठमाडौं जिल्ला अदालतले राहुललाई थुनामा पठाउने थुनछेक आदेश गरेको थियो । त्यसपछि राहुल जिल्लाको आदेशविरुद्ध उच्च अदालत पुगेका हुन् ।

इलेक्ट्रिक सिगरेट–भेपमा ल्याइएको सुनमा जोडिएपछि केन्द्रीय अनुसन्धान ब्युरो सीआईबीले राहुललाई पक्राउ गरी अनुसन्धान गरेको थियो । उनलाई आपराधिक विश्वासघात, भन्सार चोरी पैठारी र संगठित अपराधमा अभियोग दायर गरिएको थियो ।