सुदूरपश्चिम माओवादीमा विद्रोह, खगराजलाई हटाएर दलको नेतामा मानबहादुर धामी चयन

१२ माघ, कञ्चनपुर । केन्द्रको सहमति विना सुदूरपश्चिम प्रदेशमा सत्तारुढ नेकपा माओवादी केन्द्र संसदीय दलको नेताबाट खगराज भट्टलाई हटाइएको छ । शुक्रबार धनगढीमा बसेको संसदीय दलको बैठकको बहुमतबाट सुदूरपश्चिम प्रदेशसभा संसदीय दलको नेताबाट भट्टलाई हटाइएको हो ।

माओवादी केन्द्रको केन्द्रीय नेतृत्वलाई पटक पटक दलको नेता फेर्न आग्रह गर्दा पनि नसुनेको भन्दै असन्तुष्ट पक्षले बहुमत जुटाएर दलको नेता फेर्ने निर्णय गरेको हो । असन्तुष्ट समूहका नेता एवं दलका उपनेता अक्कलबहादुर रावलको अध्यक्षतामा शुक्रबार बसेको बहुमत प्रदेशसभा सदस्यहरुको बैठकले खगराज भट्टलाई हटाउँदै मानबहादुर धामीलाई दलको नेता चयन गर्ने निर्णय गरेको हो । दलको नेता परिवर्तन गरेको पत्र प्रदेशसभा सचिवालयमा पठाइएको उपनेता रावलले जानकारी दिए । 

असन्तुष्ट समूहले दलको नेता परिवर्तन गर्न पार्टी केन्द्रलाई आग्रह गरेका थिए । तर सुनुवाइ नभएकाले दलको नेता फेरिको रावलले बताए । रावलले चाडै बैठक बसेर प्रदेश सरकारबारे समेत निर्णय लिइने बताए । धामीको अध्यक्षतामा बसेको बैठकमा ६ जना प्रदेशसभा सदस्यको उपस्थित थिए ।

दल नेता खगराज भट्ट, उद्योग पर्यटन वन तथा वातावरणमन्त्री रमेश धामी, सामाजिक विकासमन्त्री झपट साउँद र प्रदेशसभा सदस्य जानकी पौडेल कुँवर भने अनुपस्थित थिए  । बहुमत प्रदेश सभा सदस्यको निर्णय गरेर दलको नेता परिवर्तन गरिएको हो । भट्टलाई हटाएर अब मानबहादुर धामीलाई दलको नेता बनाइएको छ ।