अब राष्ट्र र जनताको लागि काम गर्नु छः कृष्ण सिटौला

१३ माघ, काठमाडौं । नेपाली कांग्रेसका नेता एवं नव निर्वाचित राष्ट्रिय सभा सदस्य कृष्णप्रसाद सिटौलाले पार्टीका लागि नभई राष्ट्र र जनताका लागि काम गर्नुपर्ने बताएका छन् । निर्वाचित भइसकेपछि पहिलो पटक झापामा आयोजित औपचारिक कार्यक्रममा बोल्दै उनले गणतन्त्र ल्याएको कांग्रेसले जनताका लागि काम गर्नुपर्ने बताएका हुन् ।

गगन थापाको ‘संवाद यात्रा’को उद्‍घाटनका क्रममा उनले भने, ‘ तपाईंहरूको हातमा पार्टी छ । हामीले राष्ट्रको हितमा काम गर्नु छ । हामी हाम्रो लागि होइन राष्ट्र र जनताका लागि छौं ।’ उनले यो यात्राका क्रममा किसान–मजदुरका समस्या बुझ्नु पर्ने सुझाव दिँदै कहाँनेर त्रुटी छ, त्यो पत्ता लगाएर अघि बढ्नुपर्ने बताए ।