सशस्त्र युद्धका समय मारिएका थप ३ हजार जनालाई शहीद घोषणा गर्ने तयारीमा सरकार

१३ माघ, काठमाडौं । सरकारले थप तीन हजार जनालाई शहीद घोषणा गर्ने तयारी गरेको छ । फागुन सात अगाडि शहीद घोषणाबारे राजपत्रमा नाम प्रकाशन गर्ने तयारीमा सरकार छ । सरकारले थप ३ हजार जनालाई शहीद घोषणा गर्न लागेको जानकारी प्रधानमन्त्री पुष्पकमल दाहाल प्रचण्डले दिएका हुन् । 

शहीद प्रतिष्ठान नेपालले शनिबार काठमाडौंमा गरेको कार्यक्रममा प्रचण्डले माओवादी जनयुद्धका क्रममा मारिएका तर शहीद घोषणा गर्न बाँकी रहेका करिब ३ हजार जनालाई पनि मन्त्रिपरिषदले शहीद घोषणा गरेको र अब राजपत्रमा प्रकाशित गर्ने प्रक्रिया मात्र बाँकी रहेको बताए । 

माओवादी जनयुद्धका क्रममा ज्यान गुमाउनेहरू अरू कोही शहीद घोषणा गर्न छुटेको भए तत्काल सम्बोधन गर्ने पनि उनले आश्वासन दिए । आफू तेस्रो पटक प्रधानमन्त्री भएपछि माओवादी सशस्त्र युद्ध र जनआन्दोलनका शहिदहरु नछुट्नु भनेर विशेष ध्यान दिएको पनि प्रधानमन्त्री प्रचण्डको भनाइ छ ।

‘अझै केही छुट भएको छ भने हामीले त्यो छुट भएको बाँकीको पनि लिस्टिङ गर्दैछौँ । त्यसलाई पनि घोषणा गरिन्छ । म सबै शहीद र बेपत्ता परिवारका सदस्यहरूलाई पनि भन्न चाहन्छु–यो निर्णय आफैंमा सामान्य निर्णय होइन । यसले हाम्रा क्रान्तिलाई सम्मानित गरेको छ । युद्धलाई सम्मानित गरेको छ’, उनले भने ।