फिल्म खेल्दै ओली, चलचित्र नमेटिने घाउमा प्रधानमन्त्रीको भूमिका

१४ माघ, काठमाडौं । राजनीति विश्रामको समयमा पुगेका नेकपा एमालेका अध्यक्ष केपी शर्मा ओलीले नेपाली चलचित्रमा अभिनय गर्ने भएका छन् । उनले यसअघि प्रधानमन्त्री हुँदा निभाएका केही भूमिका र उनले गरेका भेटघाट लगायतका विषयमा कथामा समेटिने भएपछि अध्यक्ष ओलीले चलचित्रमा अभिनय गर्ने भएका हुन् ।  

उनले फिल्म नमेटिने घाउमा अभिनय गर्न लागेको बताइएको छ । आइतबार राजधानीको नयाँ बानेश्वरमा आयोजित पत्रकार सम्मेलन गरेर उक्त फिल्म निर्माणको घोषणा गरिएको हो । फिल्ममा एमाले अध्यक्ष तथा पूर्वप्रधानमन्त्री केपी शर्मा ओलीको अभिनय रहने आयोजकले बताएका छन् । उक्त फिल्ममा ओलीले प्रधानमन्त्रीको भूमिकामा देखिने छन् । 

फिल्म एसिड सर्भाइभर मुस्कान खातुनको जीवन कथामा बन्न लागेको हो । जुन फिल्म अभिनेता रमित ढुंगानाले निर्देशन गर्नेछन् । एसिड आक्रमणपछिको दृश्यमा मुस्कानकै अभिनय रहने जनाइएको छ । एसिड आक्रमण हुनुभन्दा अगाडिको पार्टमा भने रचना गौतम मुस्कान बन्नेछिन् । उनले पनि यही फिल्मबाट डेब्यु गर्न लागेकी हुन् । उनले आधा दर्जन बढी म्युजिक भिडियोमा काम गरिसकेकी छन् । 

मुस्कान खातुनमाथि २०७६ सालको भदौ २० गते वीरगन्जको रेशम कोठीस्थित त्रिभुवन हनुमान उच्च माविमा पढ्न जाँदै गर्दा एसिड प्रहार भएको थियो । एसिड आक्रमणबाट उनको अनुहारको एकातर्फको भाग जलेको छ । फिल्म निर्माणका लागि वीरगन्ज महानगरपालिकाले पाँच लाख रूपैयाँ सहयोग गरेको बताइन्छ ।