शाहिद कपूर रोबोटबाट बनेको प्रेममा परे

१४ माघ, काठमाडौं । शाहिद कपुर र कृति सेननको फिल्म ‘तेरी बातों मे ऐसा उल्झा जिया’ को ट्रेलर सार्वजनिक भएको छ । यो फिल्म मार्फत शाहिद र कृति पहिलो पटक सँगै पर्दामा देखिदैछन् ।

 फ्यानहरू यी दुई स्टारको जोडीलाई पर्दामा हेर्न आतुर छन् र यसैबीच निर्माताले फिल्मको ट्रेलर सार्वजनिक गरेका छन् । ‘तेरी बातों मे ऐसा उल्झा जिया’ को ट्रेलर रोमान्स र ड्रामाले भरिपूर्ण देखिन्छ ।

ट्रेलर हेरेर फिल्मको कथाको अनुमान लगाउन सकिन्छ । कृति सेनन फिल्म ‘तेरी बातों में ऐसा उल्झा जिया’ मा शाहिद कपूरसँग प्रेममा देखिनेछिन् । फिल्ममा उनले अमेरिकी युवती सिफ्राको भूमिका निभाएकी छिन्, जो भारतीय परिवारमा बुहारीको रुपमा आएर सबैलाई चकित पार्नेछिन् । ट्रेलरको अन्त्यमा सिफ्रा 'कृति सेनन' केटी नभई वास्तवमा रोबोट भएको देखाइएको छ ।

शाहिद कपुर र कृति सेननको अनस्क्रिन केमेस्ट्रीदेखि लिएर गीतसम्म ‘तेरी बातों मे ऐसा उल्झा जिया’ को ट्रेलरले दर्शकलाई फिल्ममा तान्ने भएको छ । निर्देशक अमित जोशी र आराधना शाहको फिल्ममा शाहिद कपूर र कृति सेनन बाहेक धर्मेन्द्र, डिम्पल कपाडिया र राकेश बेदी लगायत धेरै दिग्गज कलाकारहरू देखिनेछन्।
 
‘तेरी बातों मे ऐसा उल्झा जिया’ यो वर्षको भ्यालेन्टाइन विकमा रिलिज हुने तयारीमा छ । शाहिद कपुर र कृति सेनन अभिनित यो फिल्म फेब्रुअरी ९ मा रिलिज हुँदैछ ।