कर्मचारीको धम्कीपछि विमानस्थल घटनामा संलग्न प्रहरीलाई सरुवा गर्न गृहमन्त्रीको निर्देशन

१४ माघ, काठमाडौं । गृहमन्त्री नारायणकाजी श्रेष्ठले त्रिभुवन अन्तर्राष्ट्रिय विमानस्थलस्थित अध्यागमन कार्यालयका कर्मचारीमाथि हातपात गर्ने प्रहरीलाई विमानस्थलबाट सरुवा गर्न निर्देशन दिएका छन् । आइतबार हातपात गर्ने प्रहरीलाई कारबाही नगरे देशभरका अध्यागमन सेवा ठप्प पार्ने कर्मचारीको चेतावनीपछि गृहमन्त्री श्रेष्ठले दुई प्रहरीको सरुवा गर्न निर्देशन  दिएका हुन् । 

सिंहदरबारमा गृहमन्त्रीलाई भेट्न पुगेका कर्मचारीहरूसँग श्रेष्ठले हातपातमा उत्रिएका प्रहरी कर्मचारीहरूलाई विमानस्थलबाट हटाइने आश्वासन दिएका थिए । लगत्तै हातपातमा संलग्न असई सञ्जय तामाङ र एक प्रहरी जवानलाई विमानस्थलबाट सरुवा गर्न निर्देशन दिएका हुन् । 

गृहमन्त्रीसँगको भेटमा कर्मचारीहरूले आक्रमणमा संलग्न प्रहरीलाई कारबाही नगरे देशभरका अध्यागमन सेवा ठप्प पार्ने चेतावनी दिएका थिए । विभिन्न दलसम्बद्ध पाँच प्रमुख ट्रेड युनियनहरूले संयुक्त विज्ञप्ति जारी पनि गरेका छन् । उनीहरूले घटनामा संलग्न प्रहरी कर्मचारीलाई तीन दिनभित्र कारबाही गर्न माग गरिएका छन् । अन्यथा अध्यागमन कार्यालयलगायत देशव्यापी रुपमा कार्यालयको सेवा बन्द गर्ने लगायतका आन्दोलनका थप कार्यक्रम घोषणा गर्न वाध्य हुने उनीहरूको चेतावनी छ ।

गृहमन्त्रीलाई सम्बोधन गरी मुख्य सचिव र गृह सचिवलाई बोधार्थसहितको संयुक्त ज्ञापनपत्रमा भनिएको छ, ‘हालै भएको घटनाप्रति त्रिभुवन अन्तराष्ट्रिय विमानस्थलमा क्रियाशील ट्रेड युनियनको तर्फबाट २०८० माघ १२ गते प्रेषित विज्ञप्तिमा कालोपट्टि बाँधी सेवा प्रवाह गरिरहेको विरोधको कार्यक्रमप्रति राष्ट्रिय स्तरका ट्रेड युनियनका तर्फबाट समर्थन जनाउँदै उक्त घटनामा संलग्न प्रहरी कर्मचारीलाई तीन दिनभित्र कारबाही नभएमा त्रिभुवन विमानस्थल अध्यागमन कार्यालयलगायत देशव्यापी रुपमा कार्यालयको सेवा बन्द गर्ने लगायतका आवश्यक आन्दोलनका थप कार्यक्रम घोषणा गर्न हामी वाध्य हुने ब्यहोरा यसै ज्ञापनपत्रमार्फत जानकारी गराउँदछौं ।’

हेर्नुहोस् ज्ञापनपत्र: