प्रजातन्त्रमा बलिदान दिएकाको अपमान हुने गरी ३ हजार शहीद थप्ने प्रधानमन्त्रीको निर्णय गलत छः कोइराला

१६ माघ, काठमाडौं ।  नेपाली कांग्रेसका नेता डा. शेखर कोइरालाले तीन हजार शहीद थप्ने प्रधानमन्त्री पुष्पकमल दाहाल प्रचण्डको निर्णय गलत भएको बताएका छन् । उनले प्रधानमन्त्रीको निर्णयबाट प्रजातन्त्र र लोकतन्त्रका लागि बलिदानी दिएको शहिदहरुको अवमूल्यन गर्ने काम भएको बताए । 

मंगलबारदेखि सुरु ‘समुदायमा कांग्रेस’ अभियान अन्तर्गत विराटनगरमा आयोजित कार्यक्रममा कोइरालाले प्रजातन्त्रका निम्ति बलिदान दिएका शहिदको प्रधानमन्त्रीले अवमूल्यन गरेको बताएका हुन् । तीन हजार सहिद थप्ने प्रधानमन्त्रीको घोषणाले सच्चा शहिदको अवमूल्यन भएको उनको भनाइ छ ।
 
प्रधानमन्त्रीजीले तीन हजार थप शहिद थप्ने कुरा गलत छ, शहिद दिवसका दिन हामीले शहिदहरूको अवमूल्यन गर्नु भएन । त्यो कुरामा ध्यान दिन आवश्यक छ, कोइरालाले भने, शहिदको वास्तविक परिभाषालाई अंगीकार गरी अघि बढ्दा शहिदहरूप्रति सच्चा श्रद्धाञ्जली हुन्छ भन्ने मलाई लाग्छ । शहिदको संख्या थप्दै गर्दा शहीदकै अपमान हुने बुझेको छु ।

यही माघ १३ गते काठमाडौंमा आयोजित एक कार्यक्रममा प्रधानमन्त्री प्रचण्डले करिब तीन हजारलाई छिट्टै शहिद घोषणा गर्ने बताएका थिए । नेता कोइरालाले कांग्रेस समुदायमा पुगेर जनभावना बुझ्न अघि बढेको पनि बताए । समुदाय स्तरमा देखिएका कमीकमजोरीलाई आत्मसात् गर्दै सच्चिएर अघि बढ्नुपर्नेमा उनले जोड दिए ।