क्रिप्टो करेन्सीमार्फत १ अर्ब ४९ करोड ठगीको आरोपमा साह पक्राउ

१६ माघ, काठमाडौं । क्रिप्टो करेन्सीको कारोबार गरेको आरोपमा प्रहरीले इलामबाट एक युवकलाई पक्राउ गरेको छ । ताप्लेजुङबाट फर्किँदै गरेका ३२ वर्षका डम्बबहादुर साहलाई इलामबाट पक्राउ गरेको उपत्यका अपराध अनुसन्धान कार्यालयले जनाएको छ ।

क्यास एपमार्फत उनले २ वर्षमा १ अर्ब ४९ करोडको कारोबार गरेको देखिएको कार्यालयका प्रमुख एसएसपी सोमेन्द्रसिंह राठौरले जानकारी दिए । नेपाल प्रहरीको अपराध अनुसन्धान कार्यालयको टोलीले उनलाई पक्राउ गरेको हो । उनले १ अर्ब ४९ करोडको अनलाइन कारोबार गरेको पाइएको छ । 

काठमाडौं अपराध अनुसन्धान कार्यालयले मंगलबार अनलाइन जुवा खेल्नेहरूका लागि अवैध रुपमा रकम ट्रान्सफर गरिदिने गिरोहका नाइके साहलाई पक्राउ गरेको जानकारी दिएको हो । प्रहरीले अनलाइन जुवा खेल्न र ठगीका लागि विभिन्न माध्यमबाट रकम लोड गरिदिने उनी सप्तरीको राजविराज नगरपालिका १० डुम्री निवासी भएको जानकारी दिएको छ । 

साहले अनलाइन जुवा र अन्य अवैध कारोबारका लागि १ अर्ब ४९ करोड रूपैयाँ ट्रान्सफर गरेको तथ्य प्रहरीले अनुसन्धानबाट पत्ता लगाएको छ । प्रहरीले यो प्रकरणमा कम्तीमा पनि ३४ जना ठगिएको जनाएको छ । 

साहले अनलाइन जुवा र ठगीका लागि नगदै, क्रिप्टो करेन्सी र ब्याज लिएर बैंक ट्रान्सफरबाट पनि रकम पठाउने गरेको भेटिएको हो । अवैध रकम लेनदेनका लागि साहले उद्गम भेन्चर क्यापिटलका चारवटा बैंक खाता खोलेका र ती चारवटा खाताबाट ९१ करोड ६२ लाख ३८ हजार ६०९ कारोबार गरेको भेटिएको छ । 

सोही खाताबाट ५८ करोड ३५ हजार ६३४ रूपैयाँ कारोबार गरेको भेटिएको छ । कम्पनीका चार वटा र आफ्ना ११ वटा खाताबाट साहले यी दुई वर्षको बीचमा १ अर्ब ४९ करोड ६२ लाख ७४ हजार २४९ रूपैयाँ कारोबार गरेको प्रहरीले बताएको छ ।  

साहसहितले अनलाइन जुवाका लागि अवैध रुपमा रकम लोड गरिदिनुका साथै ह्वाट्सएप, फेसबुक र ईमो जसता सामाजिक सञ्जालबाट विभिन्न व्यक्तिहरूलाई पार्सल पठाईदिन्छु भन्दै ठग्ने गरेको पनि भेट्टिएको छ । साहले संचालन गरेको उद्गम भेन्चर क्यापिटल, प्रोफिस्ट र उनकै नामको खाताबाट विभिन्न चरणमा अवैध अनलाइन जुवाका लागि रकम पठाउने गरेको पनि अनुसन्धानबाट खुलेको छ ।