दुई समितिका ८ जना सांसद दिल्लीमा

१७ माघ, काठमाडौं ।  आठ जना सांसद भ्रमणका लागि भारत पुगेका छन् । प्रतिनिधिसभाको अन्तर्राष्ट्रिय सम्बन्ध तथा पर्यटन समितिमा रहेका ८ जना सांसदहरू भारत भ्रमणमा गएका हुन् ।  भारतीय लोकसभाको विदेश मामिला समितिको निमन्त्रणामा नेपाली सांसदहरूको टोली दिल्ली पुगेको हो ।  
 
अन्तर्राष्ट्रिय सम्बन्ध तथा पर्यटन समितिका सभापति राजकिशोर यादवको नेतृत्वमा सांसदहरूको टोली भारत गएको हो । सभापति यादवले भारतको संसद् तथा समितिहरूले कसरी काम गरिरहेको त्यसबारे प्रत्यक्ष अनुभव बटुल्ने उद्धेश्यले यो भ्रमण भएको बताए । नेपाली टोलीले बुधबार भारतको नयाँ संसद् भवनको अवलोकन तथा लोकसभाका अध्यक्ष ओम बिड्लासँग भेट्ने कार्यक्रम छ । 

नेपाली टोलीमा अन्य सांसदहरू छिरिङ शेर्पा, गंगाराम चौधरी, योगेश गौचन, शिशिर खनाल, सम्झना थपलिया, सुनिता बराल, हरिप्रसाद उप्रेती छन् । त्यस्तै, समितिका सहसचिव बबिता मिश्र र शाखा अधिकृत प्रमिला पौडेल गौतम पनि टोलीमा सामेल छन् । सांसदहरूले भारतीय विदेशमन्त्री एस. जयशंकर तथा पर्यटन मन्त्री जी किसन रेड्डीलाई भेट्ने कार्यक्रम छ ।

मंगलबार भारत पुगेका सांसदहरूको टोलीले दिल्लीस्थित नेपाली राजदूत शंकरप्रसाद शर्मा तथा दूतावासका अधिकारीहरूसँग छलफल गरेको थियो । भारत प्रस्थानपूर्व भारतमा उठाउन सकिने विषयबारे टोलीले प्रतिनिधिसभाका सभामुख देवराज घिमिरे तथा वैदेशिक मामिलाका जानकारहरूसँग पनि छलफल गरेको थियो ।

दिल्लीपछि नेपाली टोलीले गोवा, मुम्बई तथा लखनऊ र बनारस भ्रमणको कार्यक्रम छ । नेपालमा लगानी सम्मेलन हुन लागेका मुम्बईमा उद्योगी व्यवसायीसँगको भेटमा त्यसबारे पनि जानकारी गराउने यादवले बताए । राज्यका मुख्यमन्त्रीहरूसँग पनि नेपाली टोलीको भेटघाट हुनेछ ।